នៅថ្ងៃទី១៥ ខែមីនា ឆ្នាំ២០២៦ ទីប្រឹក្សាសេដ្ឋកិច្ចជាន់ខ្ពស់របស់ប្រធានាធិបតីអាមេរិក លោកDonald Trump គឺលោក Kevin Hassett បាននិយាយថា សហរដ្ឋអាមេរិកបានចំណាយប្រមាណ១២ ពាន់លានដុល្លារ លើសង្គ្រាមជាមួយអ៊ីរ៉ង់ ចាប់តាំងពីការវាយប្រហាររួមជាមួយអ៊ីស្រាអែលបានចាប់ផ្តើមនៅថ្ងៃទី២៨ ខែកុម្ភៈ។
ប្រភពពីសារព័ត៌មានAl Jazeera។
លោក Hassett បានបញ្ជាក់តួលេខនេះក្នុងកម្មវិធី Face the Nation របស់ CBS កាលពីថ្ងៃអាទិត្យ ដោយអះអាងថា នេះជាចំនួនចុងក្រោយដែលលោកទទួលបានពីការប្រចាំការណ៍។ ទោះជាយ៉ាងណា ពិធីករ Margaret Brennan បានលើកឡើងថា អាមេរិកបានចំណាយជាង ៥ ពាន់លានដុល្លារសម្រាប់គ្រាប់រំសេវតែមួយមុខ ក្នុងសប្តាហ៍ដំបូង ដែលធ្វើឱ្យមានសំណួរអំពីទំហំចំណាយពិតប្រាកដនៃសង្គ្រាម។
លោក Hassett បានបន្ថយការព្រួយបារម្ភអំពីផលប៉ះពាល់សេដ្ឋកិច្ច ដោយអះអាងថា ទីផ្សារហិរញ្ញវត្ថុកំពុងរំពឹងថា សង្គ្រាមនឹងបញ្ចប់ក្នុងរយៈពេលខ្លី ហើយតម្លៃថាមពលនឹងធ្លាក់ចុះវិញ។
ទោះជាយ៉ាងណា ភាពតានតឹងនៅតែបន្តកើនឡើង ដោយសារការគំរាមកំហែងរបស់អ៊ីរ៉ង់ពាក់ព័ន្ធនឹង ច្រកសមុទ្រ Hormuz ដែលជាផ្លូវដឹកជញ្ជូនសំខាន់សម្រាប់ប្រេងប្រមាណ ២០% នៃការផ្គត់ផ្គង់ប្រេងពិភពលោក។
លោក Hassett បានអះអាងថា សេដ្ឋកិច្ចអាមេរិកមិនងាយរងផលប៉ះពាល់ធ្ងន់ធ្ងរពីការរំខានការផ្គត់ផ្គង់ប្រេងនៅតំបន់ឈូងសមុទ្រទេ ព្រោះបច្ចុប្បន្នអាមេរិកជាប្រទេសផលិតប្រេងដ៏ធំមួយ និងមានធនធានប្រេងក្នុងស្រុកច្រើន៕
