មនុស្សយ៉ាងហោចណាស់២១នាក់បានស្លាប់ និង៥៤១នាក់ទៀតកំពុងបាត់ខ្លួននៅប្រទេសចិន បន្ទាប់ពីគ្រោះមហន្តរាយដោយលំហូរភក់បានវាយប្រហារច្រកព្រំដែនGyirongរបស់ចិន ជាប់ព្រំដែននេប៉ាល់ កាលពីថ្ងៃទី២៦ ខែសីហា។
ប្រភពពីសារព័ត៌មានChina xinhua News។
អាជ្ញាធរបានបញ្ជាក់ថា គ្រោះមហន្តរាយនេះបង្កឡើងដោយការបាក់រលំផ្ទាំងទឹកកក និងថ្មពីតំបន់ភ្នំខ្ពស់ក្នុងប្រទេសនេប៉ាល់ ដែលបានបង្កជាលំហូរភក់ និងកំទេចកំទីយ៉ាងខ្លាំងចូលមកតំបន់ច្រកព្រំដែន។
ចិនបានបញ្ជូនអ្នកជួយសង្គ្រោះប្រមាណ ២,៣០០នាក់ រថយន្តជាង ៤០០គ្រឿង និងឧបករណ៍សង្គ្រោះជាង ៨,០០០ឈុត ដើម្បីស្វែងរកអ្នកបាត់ខ្លួន។ ក្រុមសង្គ្រោះក៏បានប្រើដ្រូន និងឧទ្ធម្ភាគចក្រ ដើម្បីស្វែងរកតំបន់រងគ្រោះផងដែរ។
ផ្លូវចូលទៅតំបន់រងគ្រោះត្រូវបានជួសជុលឡើងវិញជាបឋម ហើយគ្រឿងចក្រធុនធ្ងន់ជាង ១០គ្រឿងបានចូលទៅជួយក្រុមសង្គ្រោះ។
ទោះជាយ៉ាងណា អាជ្ញាធរព្រមានថា តំបន់នេះនៅតែមានហានិភ័យខ្ពស់នៃការបាក់ដី និងរអិលថ្មបន្ថែម ដោយសារស្ថានភាពភូមិសាស្ត្រនៅមិនទាន់មានស្ថិរភាព។
ចិនក៏កំពុងសហការជាមួយនេប៉ាល់ ដោយចែករំលែកព័ត៌មានអំពីអាកាសធាតុ បឹងទឹកកក និងហានិភ័យទឹកជំនន់ ព្រមទាំងត្រៀមផ្តល់សម្ភារៈសង្គ្រោះបន្ទាន់បន្ថែមដល់នេប៉ាល់៕
