អង្គការសិទ្ធិមនុស្សអ៊ីស្រាអែលB’Tselem បាននិយាយថា អ៊ីស្រាអែលបានបង្ខំឱ្យប្រជាជនប៉ាឡេស្ទីនចាកចេញពីភូមិចំនួន៦៦នៅតំបន់West Bank ដែលស្ថិតក្រោមការកាន់កាប់ ចាប់តាំងពីខែតុលា ឆ្នាំ២០២៣។
ប្រភពពីសារព័ត៌មានAnadolu Agency នៅថ្ងៃទី៣ខែសីហា។
ករណីថ្មីបំផុតគឺភូមិ Khirbet al-Taban នៅភាគខាងត្បូងទីក្រុងHebron ដែលកងកម្លាំងអ៊ីស្រាអែលបានចូលទៅកម្ទេចផ្ទះរបស់ប្រជាជនទាំងអស់។ ភូមិនេះមានប្រជាជនប្រហែល ៧០នាក់ក្នុងនោះមានកុមារ២៨នាក់។
B’Tselem អះអាងថា កងកម្លាំងអ៊ីស្រាអែលមិនត្រឹមតែកម្ទេចផ្ទះទេ ប៉ុន្តែថែមទាំងបំផ្លាញទ្រុងចៀម ធុងទឹក កន្លែងស្តុកសម្ភារៈ និងរូងភ្នំមួយចំនួនផងដែរ។
តាមអង្គការនេះ ការបណ្តេញប្រជាជនចេញពីភូមិទាំងនេះបានធ្វើឱ្យជនជាតិប៉ាឡេស្ទីនប្រហែល៤,៩៣១នាក់ ត្រូវចាកចេញពីផ្ទះរបស់ខ្លួន ក្នុងនោះប្រហែល២,៣៣៩នាក់ជាកុមារ និងយុវជន។ ភូមិចំនួន១៨ផ្សេងទៀត ក៏ត្រូវបានបណ្តេញប្រជាជនចេញមួយផ្នែកផងដែរ៕
