នៅថ្ងៃទី៣ ខែកញ្ញា ឆ្នាំ២០២៦ អ៊ីរ៉ង់បានព្រមានថា ខ្លួននឹងឆ្លើយតបយ៉ាងធ្ងន់ធ្ងរ និងតាមវិធីជាច្រើន ប្រសិនបើសហរដ្ឋអាមេរិកវាយប្រហារអ៊ីរ៉ង់ម្តងទៀត។
ប្រភពពីសារព័ត៌មានAnadolu Agency។
អនុប្រធានាធិបតីទី១ អ៊ីរ៉ង់ លោក Mohammad Reza Aref បាននិយាយថា ការវាយប្រហាររបស់អាមេរិកកន្លងមក បានធ្វើឱ្យអ៊ីរ៉ង់ផ្លាស់ប្តូរយុទ្ធសាស្ត្រសន្តិសុខ និងការពារជាតិ។ លោកបានព្រមានថា ការឆ្លើយតបនាពេលអនាគតនឹងមានលក្ខណៈ «មិនស្មើគ្នា និងច្រើនស្រទាប់» ដើម្បីបង្កើនសម្ពាធលើភាគីវាយប្រហារ។
លោក Aref ក៏បានព្រមានពីផលប៉ះពាល់ដល់សេដ្ឋកិច្ចអាមេរិក និងបានណែនាំឱ្យជនជាតិអាមេរិកត្រៀមស្តុកប្រេងសាំង និងឥន្ធនៈ។
ការព្រមាននេះកើតឡើង ខណៈភាពតានតឹងរវាងអ៊ីរ៉ង់ និងអាមេរិកកំពុងកើនឡើង ហើយមានការព្រួយបារម្ភថា ការប្រយុទ្ធអាចប៉ះពាល់ដល់ ច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់របស់ពិភពលោក។ ប្រសិនបើការដឹកជញ្ជូនតាមតំបន់នេះត្រូវរាំងស្ទះ តម្លៃប្រេង និងសេដ្ឋកិច្ចពិភពលោកអាចរងផលប៉ះពាល់៕
