អ៊ីរ៉ង់គ្រោងប្រកាសតំបន់សមុទ្រថ្មីមួយជាតំបន់ហាមឃាត់នៅខាងក្រៅច្រកសមុទ្រHormuz ក្នុងប៉ុន្មានថ្ងៃខាងមុខ ហើយព្រមានថា នាវាណាដែលចូលក្នុងតំបន់នេះនឹងត្រូវដាក់ក្នុងបញ្ជីទណ្ឌកម្ម។
ប្រភពពីសារព័ត៌មានAnadolu Agencyនៅថ្ងៃទី៧ខែកញ្ញា។
លោក Mohsen Rezaei លេខាធិការក្រុមប្រឹក្សាសន្តិសុខជាតិជាន់ខ្ពស់អ៊ីរ៉ង់ បាននិយាយថា តំបន់ថ្មីនេះនឹងចាប់ផ្តើមពីខ្សែបិទផ្លូវរបស់កងទ័ពជើងទឹកអាមេរិក និងលាតសន្ធឹងចូលទៅក្នុងផ្នែកខ្លះនៃឈូងសមុទ្រ។
លោកក៏អះអាងថា ច្រកសមុទ្រ Hormuz ត្រូវបានបិទទាំងស្រុង និងស្ថិតក្រោមការគ្រប់គ្រងរបស់កងកម្លាំងប្រដាប់អាវុធអ៊ីរ៉ង់។ លោកបានបញ្ជាក់ថា អ៊ីរ៉ង់ និងអូម៉ង់គ្រោងចុះកិច្ចព្រមព្រៀងស្តីពីច្រកផ្លូវថ្មីតាម Hormuz ដែលចំណុចចូល និងចេញនឹងស្ថិតក្រោមការគ្រប់គ្រងរបស់អ៊ីរ៉ង់។
លោកRezaei ក៏បានអះអាងថា អ៊ីរ៉ង់បានសាកល្បងមីស៊ីលប្រឆាំងនាវាប្រភេទថ្មីនៅក្បែរនាវាចម្បាំងអាមេរិកមួយ ប៉ុន្តែមិនបានបញ្ជាក់ឈ្មោះនាវា ឬទីតាំងនៃការសាកល្បងឡើយ។
សូមបញ្ជាក់ថា៖ ភាពតានតឹងក្នុងតំបន់បានកើនឡើងយ៉ាងខ្លាំង បន្ទាប់ពីការវាយប្រហាររបស់អាមេរិក និងអ៊ីស្រាអែលលើអ៊ីរ៉ង់ចាប់តាំងពីថ្ងៃទី២៨ ខែកុម្ភៈ។ ទន្ទឹមនឹងនេះ អ៊ីរ៉ង់ និងអាមេរិកបានចោទប្រកាន់គ្នាទៅវិញទៅមកថា មិនបានអនុវត្តតាមការប្តេជ្ញាចិត្តក្នុងអនុស្សរណៈដែលបានព្រមព្រៀងគ្នាកាលពីខែមិថុនា ដើម្បីបញ្ចប់ជម្លោះ បើកច្រក Hormuz ឡើងវិញ និងដោះស្រាយបញ្ហាទណ្ឌកម្មសេដ្ឋកិច្ច៕
