មនុស្សប្រមាណ១,៦៩០នាក់បានភៀសខ្លួនចេញពីភូមិចំនួន៣ក្នុងរដ្ឋ Blue Nile ភាគអាគ្នេយ៍ប្រទេសស៊ូដង់ ដោយសារស្ថានការណ៍អសន្តិសុខកាន់តែធ្ងន់ធ្ងរ។
ប្រភពពីសារព័ត៌មានAnadolu Agencyនៅថ្ងៃទី៧ខែកញ្ញា។
អង្គការអន្តរជាតិដើម្បីការធ្វើចំណាកស្រុក (IOM) បានឱ្យដឹងថា ប្រជាជនពីភូមិ Abigo, Balang និង Gambarda ក្នុងតំបន់ Al-Kurmuk បានភៀសខ្លួនទៅតំបន់ Baw កាលពីថ្ងៃទី៥ ខែកញ្ញា។ អង្គការនេះបានព្រមានថា ស្ថានការណ៍នៅតែមានភាពតានតឹង និងមិនមានស្ថិរភាព។
ការផ្លាស់ទីលំនៅថ្មីនេះកើតឡើងបន្ទាប់ពីមនុស្សប្រមាណ៣,០០០នាក់ផ្សេងទៀតបានភៀសខ្លួនចេញពីតំបន់ Al-Kurmuk កាលពីថ្ងៃទី៣១ ខែសីហា ដោយសារការកើនឡើងនៃអំពើហិង្សា។
រដ្ឋ Blue Nile បានប្រឈមនឹងការកើនឡើងនៃការប្រយុទ្ធរវាងកងទ័ពស៊ូដង់ និងក្រុម Rapid Support Forces (RSF) ដែលមានសម្ព័ន្ធភាពជាមួយក្រុម Sudan People’s Liberation Movement-North (SPLM-N)។
សូមបញ្ជាក់ថា៖ សង្គ្រាមនៅស៊ូដង់បានបន្តតាំងពីខែមេសា ឆ្នាំ២០២៣ ដោយបានសម្លាប់មនុស្សរាប់ម៉ឺននាក់ និងបង្ខំឱ្យប្រជាជនប្រមាណ ១៣ លាននាក់ភៀសខ្លួន ឬផ្លាស់ទីលំនៅ នេះបើយោងតាមការប៉ាន់ស្មានរបស់អង្គការសហប្រជាជាតិ និងអង្គការអន្តរជាតិ៕
