អគារច្រើនជាន់មួយបានបាក់រលំនៅតំបន់ Satya Niketan ក្នុងទីក្រុងញូវដេលីរបស់ប្រទេសឥណ្ឌា កាលពីថ្ងៃអាទិត្យ បណ្តាលឱ្យមនុស្សយ៉ាងហោចណាស់៦នាក់ស្លាប់ និងមនុស្សជាច្រើននាក់ទៀតជាប់នៅក្រោមគំនរបាក់បែក។
ប្រភពពីសារព័ត៌មានAl Jazeera នៅថ្ងៃទី៧ខែកញ្ញា។
ក្រុមសង្គ្រោះ គណៈកម្មាធិការគ្រប់គ្រងគ្រោះមហន្តរាយ ប៉ូលិស និងក្រុមពន្លត់អគ្គិភ័យ បានប្រើគ្រឿងចក្រ និងសត្វឆ្កែស្វែងរក ដើម្បីស្វែងរកអ្នកនៅរស់រានមានជីវិត។ មន្ត្រីពន្លត់អគ្គិភ័យបានឱ្យដឹងថា មនុស្សរហូតដល់ប្រមាណ ៤០នាក់ អាចនៅជាប់ក្រោមគំនរបាក់បែក។
វិទ្យាស្ថានវេជ្ជសាស្ត្រ AIIMS បានបញ្ជាក់ថា ក្នុងចំណោមអ្នករងគ្រោះ១០នាក់ដែលត្រូវបានបញ្ជូនទៅមន្ទីរពេទ្យ មាន ៥នាក់ស្លាប់នៅពេលមកដល់ និងម្នាក់ទៀតបានស្លាប់នៅពេលក្រោយដោយសាររបួសធ្ងន់។
សូមបញ្ជាក់ថា៖ អគារដែលបាក់រលំនេះភាគច្រើនត្រូវបានប្រើសម្រាប់ស្នាក់នៅដោយនិស្សិត និងស្ថិតនៅក្បែរសាកលវិទ្យាល័យ Delhi។ អាជ្ញាធរបានជម្លៀសមនុស្សចេញពីអគារដែលនៅក្បែរនោះ ដោយបារម្ភថាអាចមានការបាក់រលំបន្ថែម។ មូលហេតុនៃការបាក់រលំមិនទាន់ត្រូវបានបញ្ជាក់នៅឡើយទេ៕
