អាជ្ញាធរអ៊ីស្រាអែលបានបញ្ជាឱ្យរុះរើផ្ទះប្រជាជនប៉ាឡេស្ទីនចំនួន៥ខ្នងនៅភាគខាងជើងក្រុងហ្សេរុយសាឡឹមដែលស្ថិតក្រោមការកាន់កាប់ ដោយផ្តល់ពេលឱ្យប្រជាពលរដ្ឋជម្លៀសខ្លួនត្រឹម ២៤ម៉ោងទៅ ២ថ្ងៃ។
ប្រភពពីសារព័ត៌មានAnadolu Agency នៅថ្ងៃទី៧ខែកញ្ញា។
យោងតាមJerusalem Governorate ផ្ទះមួយស្ថិតនៅជិតប៉ុស្តិ៍ត្រួតពិនិត្យយោធា Jaba ខណៈផ្ទះ ៤ខ្នងទៀតស្ថិតនៅតំបន់ Al-Ram។ អាជ្ញាធរប៉ាឡេស្ទីនបានឱ្យដឹងថា ក្នុងខែសីហា កងកម្លាំងអ៊ីស្រាអែលបានធ្វើប្រតិបត្តិការរុះរើ និងឈូសឆាយដីចំនួន ៤០លើក នៅទីក្រុងហ្សេរុយសាឡឹម។
ជាមួយគ្នានេះ ក្នុងរយៈពេល ៦ថ្ងៃដំបូងនៃខែកញ្ញា អាជ្ញាធរអ៊ីស្រាអែលបានចេញបញ្ជាហាមឃាត់ប្រជាជនប៉ាឡេស្ទីនប្រមាណ១៥នាក់មិនឱ្យចូលវិហារ Al-Aqsa។ ចំនួនសរុបនៃបញ្ជាហាមឃាត់បែបនេះ ចាប់តាំងពីដើមឆ្នាំ ២០២៦ បានកើនដល់ប្រមាណ ៨០០ករណី។
លើពីនេះJerusalem Governorate បាននិយាយថា ការចេញបញ្ជាហាមឃាត់បានកើនឡើងខ្លាំងនៅខែកញ្ញា ខណៈអ៊ីស្រាអែលត្រៀមចូលរដូវបុណ្យសាសន៍របស់ជនជាតិជ្វីហ្វ ដែលនឹងប្រព្រឹត្តទៅចាប់ពីពាក់កណ្តាលខែកញ្ញា ដល់ដើមខែតុលា៕
