បុរស២នាក់បានរួចជីវិតយ៉ាងអស្ចារ្យ បន្ទាប់ពីជាប់នៅក្នុងរូងក្រោមដីនៃគម្រោងវារីអគ្គិសនី Trishuli-3A អស់រយៈពេល៩ថ្ងៃ ដោយសារគ្រោះទឹកជំនន់និងបាក់ដីដ៏ធ្ងន់ធ្ងរនៅប្រទេសនេប៉ាល់។
ប្រភពពីសារព័ត៌មានReuterនៅថ្ងៃទី ៨ ខែកញ្ញា។
អ្នកទាំងពីរគឺឈ្មោះលោកKabir Maharjan និងលោកSanjay Sah បានជាប់នៅក្នុងផ្នែកមួយនៃរូងដែលនៅមានខ្យល់សម្រាប់ដកដង្ហើម។ ពួកគេគ្មានអាហារ និងស្ថិតក្នុងភាពងងឹត ដោយត្រូវប្រើទឹកភក់ដើម្បីរស់។
ក្រុមសង្គ្រោះបានចំណាយពេលជាច្រើនថ្ងៃ ដើម្បីជីកកម្ទេចដី ថ្ម និងឈើដែលបិទផ្លូវចូលរូង។ ភ្លៀងធ្លាក់ខ្លាំងក៏ធ្វើឱ្យការជួយសង្គ្រោះកាន់តែពិបាក ព្រោះទឹក និងដីបានហូរចូលតំបន់ដែលក្រុមសង្គ្រោះកំពុងជីក។
នៅព្រឹកថ្ងៃទី១០ ក្រុមសង្គ្រោះបានឮសំឡេងពីក្នុងរូង ហើយបន្តជីករហូតឃើញដៃរបស់អ្នកនៅរស់។ បន្ទាប់មក ពួកគេបានបើកផ្លូវតូចមួយចូលទៅ និងរកឃើញបុរសទាំងពីរនាក់នៅរស់។
អ្នកទាំងពីរត្រូវបានយកចេញពីរូង និងបញ្ជូនទៅមន្ទីរពេទ្យ។ Maharjan មានរបួសធ្ងន់នៅជើង និងត្រូវទទួលការវះកាត់។ ក្រោយត្រូវបានជួយសង្គ្រោះ គាត់មានភាពច្របូកច្របល់ខ្លាំង រហូតមិនស្គាល់ប្រពន្ធរបស់ខ្លួននៅពេលដំបូង។
ការរួចជីវិតរបស់បុរសទាំងពីរ បានផ្តល់ក្តីសង្ឃឹមដល់ក្រុមសង្គ្រោះថា អ្នកដែលនៅបាត់ខ្លួន ឬជាប់ក្នុងរូងផ្សេងទៀត ក៏អាចនៅមានជីវិត និងអាចត្រូវបានជួយសង្គ្រោះផងដែរ៕
