មេដឹកនាំបក្សប្រឆាំងអ៊ីស្រាអែល លោក Yair Lapid និងសមាជិកសភា Gilad Kariv បានរិះគន់រដ្ឋាភិបាលនាយករដ្ឋមន្ត្រី លោកBenjamin Netanyahu ចំពោះការដោះស្រាយបញ្ហាការទូតជាមួយចក្រភពអង់គ្លេស។
ប្រភពពីសារព័ត៌មានAnadolu Agency នៅថ្ងៃទី៩ខែកញ្ញា។
ការរិះគន់នេះកើតឡើង បន្ទាប់ពីអង់គ្លេសប្រកាស ហាមឃាត់ការនាំចូលទំនិញពីតំបន់តាំងទីលំនៅអ៊ីស្រាអែលនៅ West Bank ដែលអង់គ្លេសចាត់ទុកថាជាតំបន់តាំងទីលំនៅខុសច្បាប់។
លោក Lapid បាននិយាយថា ការសម្រេចរបស់អង់គ្លេសគឺជាកំហុស ប៉ុន្តែលោកក៏បន្ទោសរដ្ឋាភិបាល លោកNetanyahu ថា បានបរាជ័យផ្នែកការទូត និងកំពុងធ្វើឱ្យអ៊ីស្រាអែលកាន់តែឯកោពីសហគមន៍អន្តរជាតិ។
ចំណែកលោក Kariv បានរិះគន់វិធានការតបតរបស់រដ្ឋមន្ត្រីការបរទេស លោកGideon Saar ដោយហៅថាក្មេងខ្ចី និងធ្វើឡើងដើម្បីប្រយោជន៍នយោបាយ។
ជាការឆ្លើយតប អ៊ីស្រាអែលបានប្រកាសវិធានការមួយចំនួនប្រឆាំងអង់គ្លេស ដូចជា ការបិទស្ថានកុងស៊ុលអង់គ្លេសនៅ East Jerusalem ការបញ្ឈប់កម្មវិធីបណ្តុះបណ្តាលកងកម្លាំងប៉ាឡេស្ទីន និងការហាមឃាត់មន្ត្រីអង់គ្លេសមួយចំនួនមិនឱ្យចូលអ៊ីស្រាអែល។
អង់គ្លេសបានបញ្ជាក់ថា វិធានការរបស់ខ្លួនមានគោលដៅលើ ការពង្រីកតំបន់តាំងទីលំនៅនៅ West Bank មិនមែនប្រឆាំងអ៊ីស្រាអែលទាំងមូលនោះទេ។ អង់គ្លេសក៏បានដាក់ទណ្ឌកម្មលើបុគ្គល និងក្រុមហ៊ុនដែលជួយដល់ការពង្រីកតំបន់តាំងទីលំនៅ និងបានបន្តផ្អាកអាជ្ញាបណ្ណនាំចេញអាវុធមួយចំនួនទៅអ៊ីស្រាអែល៕
