រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា សហរដ្ឋអាមេរិកកំពុងទទួលស្គាល់ស្ថានការណ៍ដែលកំពុងកើតមាននៅលើទឹកដីអ៊ុយក្រែន និងមិនគាំទ្រឱ្យអ៊ុយក្រែនចូលជាសមាជិក NATO។
ប្រភពពីសារព័ត៌មានAnadolu Agency នៅថ្ងៃទី៩ខែកញ្ញា។
លោក Lavrov បានអះអាងថា ចំណុចនេះជាផ្នែកមួយនៃការពិភាក្សារវាងមន្ត្រីរុស្ស៊ី និងអាមេរិក ដើម្បីស្វែងរកដំណោះស្រាយចំពោះសង្គ្រាមនៅអ៊ុយក្រែន។ លោកថា ការចូល NATO របស់អ៊ុយក្រែនគឺជាបញ្ហាមួយដែលគួរតែបញ្ឈប់។
លោកក៏បាននិយាយថា ការពិចារណាស្ថានការណ៍នៅលើដីមិនមែនមានន័យតែការគ្រប់គ្រងទឹកដីប៉ុណ្ណោះទេ ប៉ុន្តែត្រូវគិតពីប្រជាជនដែលរស់នៅក្នុងតំបន់ទាំងនោះ និងទស្សនៈរបស់ពួកគេផងដែរ។
ជាមួយគ្នានេះ លោក Lavrov បានរិះគន់បណ្តាប្រទេសអឺរ៉ុបថា បានខកខានឱកាសជាច្រើនក្នុងការជួយសម្របសម្រួលការចរចារវាងរុស្ស៊ី និងអ៊ុយក្រែន។ លោកបានលើកឡើងពីការចរចានៅ Minsk និង Istanbul ថា ជាឱកាសដែលអឺរ៉ុបអាចជួយជំរុញដំណោះស្រាយសន្តិភាព។
លោក Lavrov ក៏បានព្រមានអំពីការកើនឡើងនៃភាពតានតឹងរវាងរុស្ស៊ី និងអឺរ៉ុប ដោយសារមេដឹកនាំអឺរ៉ុបមួយចំនួនចាត់ទុករុស្ស៊ីជាការគំរាមកំហែងសន្តិសុខ៕
