ក្រសួងការពារជាតិកូរ៉េខាងត្បូងបានបញ្ជូនក្រុមការងារមួយទៅកាន់ប្រទេសអេមីរ៉ាតអារ៉ាប់រួម ដើម្បីវាយតម្លៃស្ថានការណ៍សន្តិសុខនៅច្រកសមុទ្រHormuz ដែលជាផ្លូវដឹកជញ្ជូនប្រេងដ៏សំខាន់មួយរបស់ពិភពលោក។
ប្រភពពីសារព័ត៌មានAnadolu Agency នៅថ្ងៃទី៩ខែកញ្ញា។
ក្រុមការងារបានចាកចេញកាលពីចុងសប្តាហ៍ ហើយរំពឹងថានឹងត្រឡប់មកកូរ៉េខាងត្បូងវិញក្នុងសប្តាហ៍នេះ។ លទ្ធផលនៃការវាយតម្លៃនឹងត្រូវរាយការណ៍ទៅក្រុមប្រឹក្សាសន្តិសុខជាតិរបស់កូរ៉េខាងត្បូង។
មន្ត្រីក្រសួងការពារជាតិបានបញ្ជាក់ថា ការបញ្ជូនក្រុមការងារនេះមានគោលបំណងសិក្សាអំពីស្ថានការណ៍ និងសន្តិសុខនៅច្រកសមុទ្រ Hormuz មិនមែនមានន័យថា កូរ៉េខាងត្បូងបានសម្រេចបញ្ជូនកងទ័ពទៅទីនោះទេ។
កន្លងមក ប្រធានាធិបតីអាមេរិក Donald Trump បានអំពាវនាវឱ្យកូរ៉េខាងត្បូង និងប្រទេសមួយចំនួនទៀតបញ្ជូននាវាចម្បាំងទៅជួយការពារសេរីភាពនៃការធ្វើនាវាចរណ៍នៅច្រកសមុទ្រនេះ។ ប៉ុន្តែទីក្រុងសេអ៊ូលបានបញ្ជាក់ថា មិនទាន់មានការសម្រេចចិត្តបញ្ជូនកងទ័ពឡើយ។
ទោះជាយ៉ាងណា ក្រសួងការពារជាតិកំពុងពិនិត្យលទ្ធភាព និងសម្ភារៈយោធាដែលអាចប្រើប្រាស់បាន ប្រសិនបើមានការសម្រេចចិត្តចូលរួម ដោយរួមមានយន្តហោះល្បាតតាមសមុទ្រ អ្នកជំនាញកម្ចាត់គ្រាប់បែក និងឧបករណ៍ស្វែងរក និងកម្ទេចមីនក្នុងសមុទ្រ។
ជាមួយគ្នានេះ អ៊ីរ៉ង់បានព្រមានថា ប្រសិនបើកូរ៉េខាងត្បូងចូលរួមផ្នែកយោធានៅតំបន់ឈូងសមុទ្រពែរ្ស និងច្រកសមុទ្រ Hormuz នោះអាចនាំឱ្យមាន “ផលវិបាកធ្ងន់ធ្ងរ”៕
