អ៊ីរ៉ង់បានអះអាងថា កងកម្លាំងឆ្មាំបដិវត្តន៍អ៊ីរ៉ង់(IRGC) បានចាប់យកដ្រូនមុជទឹករបស់សហរដ្ឋអាមេរិក នៅតំបន់ច្រកចូលច្រកសមុទ្រHormuz។
ប្រភពពីសារព័ត៌មាន Reuter នៅថ្ងៃទី៩ ខែកញ្ញា។
តាមប្រព័ន្ធផ្សព្វផ្សាយរដ្ឋអ៊ីរ៉ង់ និយាយថា យាននេះគឺជា Dive-LD ដែលជាយានមុជទឹកស្វ័យប្រវត្តិផលិតដោយក្រុមហ៊ុនការពារជាតិ Anduril របស់អាមេរិក។
យាននេះមានប្រវែងប្រហែល៥.៨ ម៉ែត្រ និងអាចប្រើសម្រាប់ស្ទង់ផ្ទៃបាតសមុទ្រ ស្វែងរកមីនប្រមូលព័ត៌មាន និងពិនិត្យហេដ្ឋារចនាសម្ព័ន្ធក្រោមទឹក ដូចជា ខ្សែកាប និងបំពង់បង្ហូរ។
អ៊ីរ៉ង់ បានចាត់ទុកការចាប់យកយាននេះថា ជាការចាប់បានឧបករណ៍យោធាទំនើបរបស់អាមេរិក។
ប៉ុន្តែសហរដ្ឋអាមេរិកបានបដិសេធថា វាមិនមែនជាការចាប់យកតាមរយៈប្រតិបត្តិការយោធាឡើយ។
ដោយក្រសួងការពារជាតិអាមេរិកបាននិយាយថា យាននេះបានខូចប្រព័ន្ធជាងមួយថ្ងៃមុន ខណៈកំពុងបំពេញបេសកកម្មស្ទង់ទឹកសមុទ្រ។
ក្រុមហ៊ុន Anduril ក៏បានបញ្ជាក់ថា ខ្លួនបានបាត់បង់យានមួយគ្រឿងពិតមែន ប៉ុន្តែបាននិយាយថា Dive-LD ត្រូវបានរចនាឡើងសម្រាប់ប្រតិបត្តិការនៅក្នុងតំបន់មានគ្រោះថ្នាក់ ហើយការបាត់បង់យានប្រភេទនេះគឺជាលទ្ធភាពដែលបានគិតទុកជាមុន។
ហេតុការណ៍នេះកើតឡើងនៅពេលភាពតានតឹងរវាងអ៊ីរ៉ង់ និងសហរដ្ឋអាមេរិកកំពុងកើនឡើងខ្លាំងនៅជុំវិញច្រកសមុទ្រ Hormuz ដែលជាតំបន់យុទ្ធសាស្ត្រសំខាន់សម្រាប់ការដឹកជញ្ជូនប្រេងរបស់ពិភពលោក៕
