តម្លៃប្រេងម៉ាស៊ូតជាមធ្យមនៅទូទាំងសហរដ្ឋអាមេរិក បានឡើងលើស៦ដុល្លារក្នុងមួយហ្គាឡុង ជាលើកដំបូងក្នុងប្រវត្តិសាស្ត្រ។
ប្រភពពីសារព័ត៌មានReuter នៅថ្ងៃទី១១ខែកញ្ញា។
ការកើនឡើងនេះបណ្តាលមកពី សង្គ្រាមរវាងអាមេរិក–អ៊ីស្រាអែល និងអ៊ីរ៉ង់ ដែលធ្វើឱ្យការផ្គត់ផ្គង់ប្រេងមានភាពតឹងតែង ខណៈការវាយប្រហាររបស់អ៊ុយក្រែនលើរោងចក្រចម្រាញ់ប្រេងរបស់រុស្ស៊ី ក៏បានប៉ះពាល់ដល់ការផ្គត់ផ្គង់ប្រេងផងដែរ។
ប្រេងម៉ាស៊ូតមានសារៈសំខាន់សម្រាប់ រថយន្តដឹកទំនិញ រថភ្លើង កប៉ាល់ ម៉ាស៊ីនធុនធ្ងន់ និងវិស័យកសិកម្ម។ ដូច្នេះ ការឡើងថ្លៃប្រេងអាចធ្វើឱ្យថ្លៃដឹកជញ្ជូន និងទំនិញផ្សេងៗកើនឡើងបន្ថែមទៀត។
ជាមួយគ្នានេះ ស្តុកប្រេងម៉ាស៊ូតរបស់អាមេរិក មានកម្រិតទាបជាងមធ្យមភាគរយៈពេល៥ឆ្នាំប្រហែល ១៣%។ តម្លៃប្រេងឆៅក៏បានកើនឡើងខ្លាំង ដោយប្រេង Brent ឡើងដល់ ១០៧.៦៣ដុល្លារ/បារ៉ែល និងប្រេង WTI ដល់ ១០២.៤៨ដុល្លារ/បារ៉ែល។
ការឡើងថ្លៃប្រេងកំពុងបង្កើនសម្ពាធលើ អតិផរណា និងការចំណាយរបស់ប្រជាជនអាមេរិក ហើយក៏ក្លាយជាបញ្ហានយោបាយសម្រាប់ប្រធានាធិបតី Donald Trump និងគណបក្សសាធារណរដ្ឋ មុនការបោះឆ្នោតពាក់កណ្តាលអាណត្តិនៅខែវិច្ឆិកា៕
