ក្រុមប្រឹក្សាសន្តិសុខអង្គការសហប្រជាជាតិ (អ.ស.ប.) កាលពីថ្ងៃទី១១ ខែកញ្ញា បានបោះឆ្នោតជាឯកច្ឆន្ទ ដើម្បីបន្តការហាមឃាត់ការផ្គត់ផ្គង់អាវុធទៅកាន់តំបន់ដាហ្វួរ ភាគខាងលិចប្រទេសស៊ូដង់ រយៈពេល១ខែទៀត។
ប្រភពពីសារព័ត៌មានAl Jazeera នៅថ្ងៃទី១២ខែកញ្ញា។
ការបន្តនេះធ្វើឡើង ខណៈសមាជិកក្រុមប្រឹក្សាសន្តិសុខកំពុងពិភាក្សាលើសំណើរបស់សហរដ្ឋអាមេរិក ដែលចង់ពង្រីកការហាមឃាត់អាវុធពីតំបន់ដាហ្វួរ ទៅគ្រប់តំបន់ទូទាំងប្រទេសស៊ូដង់ ដើម្បីដាក់សម្ពាធលើភាគីដែលកំពុងប្រយុទ្ធគ្នា ឱ្យបញ្ចប់សង្គ្រាមដែលបានអូសបន្លាយជាង៣ឆ្នាំ។
ឯកអគ្គរដ្ឋទូតអាមេរិកប្រចាំ អ.ស.ប. លោក Jeff Bartos បាននិយាយថា ទណ្ឌកម្មដែលមានស្រាប់មានអាយុកាលជាង២០ឆ្នាំ ហើយមិនគ្រប់គ្រាន់ក្នុងការឆ្លើយតបទៅនឹងស្ថានភាពសង្គ្រាមបច្ចុប្បន្នឡើយ។ អាមេរិកក៏ចង់ឱ្យមានទណ្ឌកម្មលើអ្នកពាក់ព័ន្ធនឹងអំពើហិង្សាផ្លូវភេទ ការចាប់ជំរិត និងការវាយប្រហារលើបុគ្គលិកជំនួយមនុស្សធម៌ផងដែរ។
ជាមួយគ្នានេះ ឯកអគ្គរដ្ឋទូតស៊ូដង់បានជំទាស់នឹងការហាមឃាត់អាវុធទូទាំងប្រទេស ដោយអះអាងថា វាអាចផ្ទុយនឹងសិទ្ធិរបស់ប្រទេសក្នុងការការពារខ្លួនឯងតាមធម្មនុញ្ញ អ.ស.ប.។
សូមបញ្ជាក់ថា៖ ការហាមឃាត់អាវុធលើតំបន់ដាហ្វួរ ត្រូវបានដាក់តាំងពីឆ្នាំ២០០៤ បន្ទាប់ពីជម្លោះនៅតំបន់នេះបានផ្ទុះឡើង។ ជម្លោះនោះបានបណ្តាលឱ្យមនុស្សរហូតដល់ប្រហែល៣០ម៉ឺននាក់ស្លាប់ និងប្រជាជនប្រមាណ២.៧លាននាក់ត្រូវភៀសខ្លួនចេញពីផ្ទះ៕
