ប្រធានគោលនយោបាយការបរទេសរបស់សហភាពអឺរ៉ុប (EU) លោកស្រី Kaja Kallas បាននិយាយថា EU កំពុងពិភាក្សាអំពីការដាក់ទណ្ឌកម្មបន្ថែមលើអ្នកតាំងទីលំនៅអ៊ីស្រាអែល ពាក់ព័ន្ធនឹងប្រើអំពើហិង្សានៅតំបន់West Bank។
ប្រភពពីសារព័ត៌មានAnadolu Agency។
លោកស្រី Kallas បាននិយាយថា ការពង្រីកតំបន់តាំងទីលំនៅ ការបង្ខំប្រជាជនឱ្យចាកចេញពីផ្ទះ និងអំពើហិង្សារបស់អ្នកតាំងទីលំនៅ កំពុងកើនឡើង។ EU បានដាក់ទណ្ឌកម្មលើអ្នកតាំងទីលំនៅដែលខ្លួនចាត់ទុកថាជាអ្នកប្រព្រឹត្តអំពើហិង្សារួចហើយចំនួន ៣ជុំ ហើយកំពុងពិភាក្សាអំពីវិធានការបន្ថែម។
លោកស្រីក៏បានព្រមានថា គម្រោងពង្រីកតំបន់តាំងទីលំនៅ E1 នៅជិតក្រុង Jerusalem អាចធ្វើឱ្យការស្វែងរកដំណោះស្រាយ រដ្ឋពីរ រវាងអ៊ីស្រាអែល និងប៉ាឡេស្ទីន កាន់តែពិបាក។
ចំពោះតំបន់ Gaza លោកស្រី Kallas បាននិយាយថា ស្ថានភាពមនុស្សធម៌នៅតែធ្ងន់ធ្ងរ ទោះបីមានបទឈប់បាញ់ក៏ដោយ ហើយមនុស្សនៅតែស្លាប់ និងរងរបួស។
សមាជិកសភាអឺរ៉ុបមួយចំនួនបានជំរុញឱ្យ EU ចាត់វិធានការខ្លាំងជាងមុន ដូចជា ទណ្ឌកម្ម និងការហាមឃាត់ពាណិជ្ជកម្មជាមួយតំបន់តាំងទីលំនៅអ៊ីស្រាអែល៕
