តាំងពីដើមឆ្នាំ២០២៥ សិស្សានុសិស្សមកពីគ្រួសារមានបណ្ណសមធម៌ ជិត៤៣ម៉ឺននាក់ ទទួលបានប្រាក់ឧបត្ថម្ភប្រចាំខែពីរាជរដ្ឋាភិបាល។ គោលនយោបាយនេះមិនត្រឹមតែរួមចំណែកសម្រាលជីវភាពគ្រួសារក្រីក្រប៉ុណ្ណោះទេ ប៉ុន្តែបានចូលរួមពង្រឹងការសិក្សារបស់សិស្ស ដែលឆ្លុះបញ្ចាំងជាក់ស្តែងតាមរយៈលទ្ធផលប្រឡងបាក់ឌុបនាពេលកន្លងទៅ។
កម្មវិធីអាហារូបករណ៍សិស្សក្រីក្រនៅបឋមសិក្សា និងមធ្យមសិក្សានេះ ស្ថិតក្នុងកម្មវិធីជាតិជំនួយសង្គមក្នុងកញ្ចប់គ្រួសារ ដែលជាកម្មវិធីគោលនយោបាយអាទិភាពមួយ ក្នុងចំណោមកម្មវិធីគោលនយោបាយអាទិភាពទាំង៦ របស់សម្ដេចមហាបវរធិបតី ហ៊ុន ម៉ាណែត សម្រាប់រាជរដ្ឋាភិបាលនីតិកាលទី៧ នៃរដ្ឋសភា។
គោលបំណងនេះគឺលើកកម្ពស់ការសិក្សាអប់រំ និងជាពិសេសចូលរួមកាត់បន្ថយអត្រានៃការបោះបង់ការសិក្សាចំពោះគ្រួសារក្រីក្រ ក៏ដូចជាឈរលើគោលការ “មិនបោះបង់ពលរដ្ឋណាម្នាក់”រាជរដ្ឋាភិបាលកម្ពុជា តាមរយៈប្រព័ន្ធគាំពារសង្គម បានសម្រេចដាក់ចេញនូវកម្មវិធីអាហារូបករណ៍សិស្សក្រីក្រនៅបឋមសិក្សា និងមធ្យមសិក្សា ដើម្បីផ្តល់ជូនប្រាក់ឧបត្ថម្ភប្រចាំខែជូនដល់គ្រួសារក្រីក្រមានបណ្ណសមធម៌ ដែលមានសមាជិកសិក្សានៅបឋមសិក្សា (ថ្នាក់ទី១ ដល់ទី៦) និងមធ្យមសិក្សា(ថ្នាក់ទី៧ ដល់ថ្នាក់ទី១២)។
គិតត្រឹមខែសីហា ឆ្នាំ២០២៦ រាជរដ្ឋាភិបាលកម្ពុជាបានផ្តល់ប្រាក់ឧបត្ថម្ភប្រចាំខែជូនសិស្សានុសិស្សនៅបឋមសិក្សា និងមធ្យមសិក្សាក្នុងឆ្នាំសិក្សា ២០២៥-២០២៦ ដែលជាសមាជិកគ្រួសារមានបណ្ណសមធម៌ សរុបចំនួនជិត ៤៣ម៉ឺននាក់នៅទូទាំងប្រទេស។ ដើម្បីអនុវត្តកម្មវិធីនេះ រាជរដ្ឋាភិបាលគ្រោងវិភាជថវិកាប្រមាណ ៣០លានដុល្លារ ក្នុង១ឆ្នាំៗ ។
កម្មវិធីអាហារូបករណ៍សិស្សក្រីក្រនៅបឋមសិក្សា និងមធ្យមសិក្សា បានដើរតួនាទីយ៉ាងសំខាន់ក្នុងការចូលរួមកាត់បន្ថយសម្ពាធថវិកាក្នុងគ្រួសារ ព្រមទាំងជួយទប់ស្កាត់ និងកាត់បន្ថយអត្រាបោះបង់ការសិក្សារបស់សិស្សានុសិស្សដែលមកពីគ្រួសារក្រីក្រ។
នៅក្នុងឆ្នាំ២០២៦ សិស្សានុសិស្សដែលជាសមាជិកគ្រួសារមានបណ្ណសមធម៌ ចំនួន ៦ ២៩១ នាក់ មានឱកាសចូលរួមប្រឡងសញ្ញាបត្រមធ្យមសិក្សាទុតិយភូមិ (បាក់ឌុប)។ ក្នុងចំណោមនោះមានសិស្សានុសិស្សចំនួន ៦១ នាក់ បានប្រឡងជាប់និទ្ទេស A ទៀតផង៕
