(ភ្នំពេញ)៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ថ្លែងថា បរិស្ថានព័ត៌មានកំពុងផ្លាស់ប្តូរយ៉ាងឆាប់រហ័ស ដោយសារបច្ចេកវិទ្យាឌីជីថល។
បណ្តាញសង្គម និងបញ្ញាសិប្បនិម្មិត (AI) ដែលបានពង្រីកវិសាលភាពនៃការទទួលបានព័ត៌មាន ព័ត៌មានភាន់ច្រឡំ ព័ត៌មានក្លែងបន្លំ និងខ្លឹមសារកែច្នៃបន្លំ ក៏កំពុងកើតឡើងកាន់តែលឿន ស្មុគស្មាញ និងបង្កការលំបាក។
ឯកឧត្តម នេត្រ ភក្ត្រា បានថ្លែងបែបនេះក្នុងពិធីបិទវេទិកាប្រព័ន្ធផ្សព្វផ្សាយស្តីពីការប្រយុទ្ធប្រឆាំងព័ត៌មានក្លែងក្លាយ និងពិធីប្រកួតប្រជែងជ័យលាភីអ្នកផលិតមាតិកាប្រយុទ្ធប្រឆាំងព័ត៌មានក្លែងក្លាយឆ្នាំ២០២៦ ក្រោមប្រធានបទ ការប្រយុទ្ធប្រឆាំងនឹងព័ត៌មានក្លែងក្លាយ និងការលើកកម្ពស់សុចរិតភាពព័ត៌មាននៅក្នុងតំបន់មេគង្គ-ឡានឆាង នៅថ្ងៃទី១៧ ខែកញ្ញា ឆ្នាំ២០២៦ ក្នុងរាជធានីភ្នំពេញ។
ឯកឧត្តម នេត្រ ភក្ត្រា បន្តថា បញ្ហាប្រឈមមិនមែនត្រឹមតែបរិមាណព័ត៌មានមិនពិតប៉ុណ្ណោះទេ។
ប៉ុន្តែថែមទាំងល្បឿន ទំហំ និងផលប៉ះពាល់ដ៏ខ្លាំងក្លារបស់វាទៅលើទំនុកចិត្តសាធារណៈ សាមគ្គីភាពសង្គម និងភាពជឿជាក់។
ឯកឧត្តម នេត្រ ភក្ត្រា បានលើកឡើងយ៉ាងដូច្នេះថា៖ ហេតុនេះ ការពង្រឹងសុចរិតភាពព័ត៌មាន ទាមទារលើសពីការកែតម្រូវព័ត៌មានមិនពិតបន្ទាប់ពីវាបានលេចឡើង។
វាទាមទារឱ្យមានការបង្ការ ការផ្ទៀងផ្ទាត់បែបវិជ្ជាជីវៈ ទំនាក់ទំនងសាធារណៈដែលគួរឱ្យទុកចិត្ត ការប្រើប្រាស់បច្ចេកវិទ្យាដោយទំនួលខុសត្រូវ និងកិច្ចសហប្រតិបត្តិការជាក់ស្តែង៕
