ប្រធានាធិបតីកូរ៉េខាងត្បូង លោក Lee Jae Myung បានបញ្ជាក់នៅថ្ងៃទី១៨ ខែកញ្ញា ឆ្នាំ២០២៦ ថាកូរ៉េខាងត្បូង នឹងមិនបញ្ជូនទាហានឲ្យចូលរួមប្រយុទ្ធក្នុងសង្គ្រាមនៅតំបន់ច្រកសមុទ្រHormuzឡើយ។
ប្រភពពីសារព័ត៌មានAA news។
លោក Lee បាននិយាយថា រដ្ឋាភិបាលនឹងមិនចូលរួម ឬធ្វើអន្តរាគមន៍ក្នុងសង្គ្រាមនៅក្រៅប្រទេសទេ។ ប៉ុន្តែ កូរ៉េខាងត្បូងនឹងពិចារណាវិធានការចាំបាច់ ដើម្បីការពារ ពលរដ្ឋ កប៉ាល់ពាណិជ្ជកម្ម និងផ្លូវដឹកជញ្ជូនប្រេងឆៅ របស់ខ្លួន។
អង្គភាពយោធា Cheonghae របស់កូរ៉េខាងត្បូង ដែលមានវត្តមាននៅតំបន់នោះ បានពង្រីកវិសាលភាពបេសកកម្មរបស់ខ្លួនរួចហើយ។ ទីក្រុងសេអ៊ូលក៏កំពុងពិនិត្យលទ្ធភាពបន្ថែម ដូចជា យន្តហោះល្បាតសមុទ្រ ក្រុមជំនាញដោះគ្រាប់បែក និងប្រព័ន្ធគ្មានមនុស្សបើក សម្រាប់ស្វែងរក និងដោះមីនក្នុងសមុទ្រ។ ទោះជាយ៉ាងណា មិនទាន់មានការសម្រេចចិត្តចុងក្រោយទេ។
សូមបញ្ជាក់ថា៖ ច្រកសមុទ្រ Hormuz មានសារៈសំខាន់ខ្លាំងសម្រាប់ការនាំចូលប្រេងរបស់កូរ៉េខាងត្បូង។ ជម្លោះជាមួយអ៊ីរ៉ង់ និងសកម្មភាពក្រុម Houthi នៅតំបន់ Bab el-Mandeb បានធ្វើឱ្យការដឹកជញ្ជូនតាមសមុទ្រមានហានិភ័យកាន់តែខ្លាំង។ លោក Lee បានបញ្ជាក់ថា កូរ៉េខាងត្បូងធ្លាប់ជួបការលំបាកក្នុងការទទួលបានប្រេងឆៅ នៅដើមជម្លោះ ដោយសារកប៉ាល់មួយចំនួនជៀសវាងតំបន់ដែលមានគ្រោះថ្នាក់៕
