យោធាប៉ាគីស្ថានបានឱ្យដឹងនៅថ្ងៃទី១៨ ខែកញ្ញា ឆ្នាំ២០២៦ថា ទាហាន៦នាក់ និងសមាជិកក្រុមប្រដាប់អាវុធ ១០នាក់បានស្លាប់ ក្នុងការប៉ះទង្គិច និងប្រតិបត្តិការសន្តិសុខជាច្រើន នៅខេត្ត Khyber Pakhtunkhwa ភាគពាយ័ព្យប្រទេស។
ប្រភពពីសារព័ត៌មានAA news។
តាមយោធា ទាហាន ៦នាក់បានស្លាប់នៅពេល គ្រឿងផ្ទុះកែច្នៃ (IED) បានផ្ទុះប៉ះក្បួនរថយន្តយោធា កាលពីថ្ងៃទី១៧ ខែកញ្ញា។
ក្នុងប្រតិបត្តិការមួយទៀតនៅតំបន់ North Waziristan កងកម្លាំងបានបាញ់សម្លាប់សមាជិកក្រុមប្រដាប់អាវុធ ៦នាក់ បន្ទាប់ពីមានការបាញ់ប្រហារគ្នាយ៉ាងខ្លាំង។ នៅតំបន់ Hangu ក៏មានសមាជិកក្រុមប្រដាប់អាវុធ ៤នាក់ទៀតត្រូវបានសម្លាប់។
យោធាបាននិយាយថា កងកម្លាំងបានរកឃើញ អាវុធ និងគ្រាប់រំសេវ ពីក្រុមដែលត្រូវបានសម្លាប់ ហើយកំពុងបន្តប្រតិបត្តិការស្វែងរក ដើម្បីរកសមាជិកក្រុមប្រដាប់អាវុធដែលនៅសល់។
ប៉ាគីស្ថានកំពុងបន្តយុទ្ធនាការប្រឆាំងអំពើហិង្សារបស់ក្រុមប្រដាប់អាវុធ តាមរយៈគំនិតផ្តួចផ្តើម Azm-e-Istehkam ខណៈអំពើហិង្សាបែបនេះបានកើនឡើងនៅតំបន់ Khyber Pakhtunkhwa និង Balochistan ក្នុងរយៈពេលប៉ុន្មានឆ្នាំចុងក្រោយ៕
