កងកម្លាំងអ៊ីស្រាអែលនៅថ្ងៃទី១៨ ខែកញ្ញា បានបាញ់ផ្លោងទៅលើតំបន់ជាយក្រុងBeit Jinn ភាគខាងលិចជាយក្រុងដាម៉ាស ប្រទេសស៊ីរី។ ទន្ទឹមនឹងនោះ កងកម្លាំងអ៊ីស្រាអែលបានបញ្ជូនរថយន្តយោធា៩គ្រឿង ចូលតំបន់ Wadi al-Raqad នៅភាគខាងត្បូងស៊ីរី។
ប្រភពពីសារព័ត៌មានAA news។
តាមប្រព័ន្ធផ្សព្វផ្សាយរដ្ឋស៊ីរី កងកម្លាំងអ៊ីស្រាអែលក៏បាន ឃាត់ខ្លួនអ្នកគង្វាលម្នាក់ នៅក្នុងតំបន់ Wadi al-Raqad ផងដែរ។ មិនទាន់មានព័ត៌មានថា ការបាញ់ផ្លោងនៅ Beit Jinn បណ្តាលឱ្យមានអ្នកស្លាប់ ឬរបួសប៉ុន្មាននាក់ឡើយ។
តំបន់ Wadi al-Raqad ស្ថិតនៅជិតតំបន់ Yarmouk Basin ក្នុងខេត្ត Daraa ហើយធ្លាប់មានការចូលរបស់កងកម្លាំងអ៊ីស្រាអែលជាច្រើនលើកក្នុងរយៈពេលប៉ុន្មានខែចុងក្រោយ។
ការចូលមកក្នុងភាគខាងត្បូងស៊ីរីបានកើតឡើងជាបន្តបន្ទាប់ ចាប់តាំងពីការដួលរលំរបប Bashar al-Assad នៅថ្ងៃទី៨ ខែធ្នូ ឆ្នាំ២០២៤។ អ៊ីស្រាអែលបានចូលកាន់កាប់តំបន់ទ្រនាប់ព្រំដែន និងតំបន់មួយចំនួនផ្សេងទៀត ខណៈរដ្ឋាភិបាលស៊ីរីទាមទារឱ្យអ៊ីស្រាអែលដកកងទ័ពត្រឡប់ទៅខ្សែទីតាំងដែលមានមុនថ្ងៃទី៨ ខែធ្នូ ឆ្នាំ២០២៤៕
