នៅថ្ងៃទី១៩ ខែកញ្ញា ឆ្នាំ២០២៦ បុរសវ័យ១៩ឆ្នាំម្នាក់ឈ្មោះ
Chan Mathok Atak មកពីស៊ូដង់ខាងត្បូង ត្រូវតុលាការអង់គ្លេសកាត់ទោសឱ្យជាប់ពន្ធនាគារ២ឆ្នាំ៣ខែ ព្រោះបានបើកទូកដឹកជនចំណាកស្រុកឆ្លងកាត់ច្រកសមុទ្រEnglish Channel ពីបារាំងទៅអង់គ្លេស។
ប្រភពពីសារព័ត៌មានAl Jazeera។
កាលពីថ្ងៃទី២៣ ខែកក្កដា លោក Atak ត្រូវបានចោទថា បានបើកទូកប្រវែងប្រហែល ១៤ម៉ែត្រ ដែលមានមនុស្សរហូតដល់ ១៦៥នាក់ ក្នុងនោះមានកុមារ ៣១នាក់ អាយុពី ១៤ ដល់ ១៧ឆ្នាំ។
អាជ្ញាធរបាននិយាយថា ទូកមានម៉ាស៊ីនដំណើរការតែមួយគ្រឿង ហើយ គ្មានឧបករណ៍សង្គ្រោះ ឧបករណ៍រុករក ឬឧបករណ៍សង្គ្រោះបឋមគ្រប់គ្រាន់ទេ។ មុនពេលកងការពារព្រំដែនអង់គ្លេសចូលអន្តរាគមន៍ ទូកក៏ចាប់ផ្តើមបាត់ខ្យល់ និងមានទឹកចូលផងដែរ។
តុលាការបានឱ្យដឹងថា លោកAtak និងមនុស្សម្នាក់ទៀតបានប្តូរវេនគ្នាបើកទូក ហើយ Atak បានបើកទូកយ៉ាងហោចណាស់៩០នាទី។
លោកAtak បានទទួលស្គាល់កំហុសក្នុងការបង្កគ្រោះថ្នាក់ដល់អ្នកដំណើរ។ ចៅក្រមបានសម្រេចថា ករណីនេះធ្ងន់ធ្ងរ និងត្រូវដាក់ទោសជាប់ពន្ធនាគារ។ បន្ទាប់ពីបញ្ចប់ទោស លោកក៏អាចប្រឈមនឹង ការបញ្ជូនចេញពីចក្រភពអង់គ្លេសដោយស្វ័យប្រវត្តិ៕
