តម្លៃប្រេង បានងើបឡើងវិញជាង១% នៅថ្ងៃចន្ទទី២៨.០៩.២០២៦ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានបដិសេធកិច្ចព្រមព្រៀងសន្តិភាពពីអ៊ីរ៉ង់ ដើម្បីដោះស្រាយជម្លោះ និងបើកច្រកសមុទ្រហ័រមូស (Strait of Hormuz)ឡើងវិញ។
ដែលធ្វើឱ្យភាពតានតឹងនៅមជ្ឈិមបូព៌ានៅតែបន្តកើនឡើង។
សារព័ត៌មាន(Reuters)។
តម្លៃប្រេងឆៅ Brent សម្រាប់ការដឹកជញ្ជូននាពេលអនាគតបានកើនឡើង១,៣២ ដុល្លារ ឬ ១,២៧% ដល់ ១០៥,៦៤ ដុល្លារក្នុងមួយបារ៉ែល នៅម៉ោង ០០:៣៦ GMT។
ខណៈដែលតម្លៃប្រេងឆៅអាមេរិក West Texas Intermediate (WTI) មានតម្លៃ ៩៣,១១ ដុល្លារក្នុងមួយបារ៉ែល ពោលគឺកើនឡើង ៧០ សេន ឬ ០,៧៦%។
អ៊ីរ៉ង់ បានប្រកាសពីសំណើស្ដីពីសន្តិភាពកាលពីសប្តាហ៍មុន នៅឯមហាសន្និបាតអង្គការសហប្រជាជាតិក្នុងទីក្រុងញូវយ៉ក។
ដោយបញ្ជាក់ថា សំណើនោះត្រូវបានបញ្ជូនទៅកាន់ភាគីអាមេរិកតាមរយៈអ្នកសម្របសម្រួលកាតា។
លោក ត្រាំ បាននិយាយកាលពីថ្ងៃសៅរ៍ថា លោកបានបដិសេធផែនការនេះ ប៉ុន្តែបានប្រាប់សារព័ត៌មាន Axios នៅក្នុងបទសម្ភាសន៍តាមទូរស័ព្ទកាលពីថ្ងៃអាទិត្យថា លោករំពឹងថាអ្នកចរចារបស់អាមេរិកនឹងចូលរួមក្នុងការចរចាបន្ថែមទៀតនៅសប្តាហ៍នេះ។
អ្នកវិភាគរបស់ធនាគារ ANZ បានលើកឡើងនៅក្នុងរបាយការណ៍មួយថា៖ ហានិភ័យភូមិសាស្ត្រនយោបាយនៅតែមានកម្រិតខ្ពស់ ខណៈដែលក្រុមហ៊ូធី (Houthis) និងអ៊ីរ៉ង់បន្តការវាយប្រហារលើប្រទេសអារ៉ាប៊ីសាអូឌីត ដែលធ្វើឱ្យលំហូរនៃការផ្គត់ផ្គង់ក្នុងតំបន់ប្រឈមនឹងហានិភ័យ។
សម្ព័ន្ធភាពដឹកនាំដោយអារ៉ាប៊ីសាអូឌីតនៅយេម៉ែនបាននិយាយកាលពីព្រឹកថ្ងៃសៅរ៍ថា ខ្លួនបានស្ទាក់ចាប់មីស៊ីលផ្លោងចំនួន ២ គ្រាប់ និងយន្តហោះគ្មានមនុស្សបើក (drone) ចំនួន ២ គ្រឿង ដែលបាញ់ចេញដោយក្រុមហ៊ូធីដែលគាំទ្រដោយអ៊ីរ៉ង់ ឆ្ពោះទៅកាន់ព្រះរាជាណាចក្រអារ៉ាប៊ីសាអូឌីត។
តម្លៃប្រេង Brent បានកើនឡើងបន្តិច ០,៤% កាលពីសប្តាហ៍មុន ប៉ុន្តែតម្លៃប្រេង WTI បានធ្លាក់ចុះ ៧,៩% ដោយសារក្តីបារម្ភថា សហរដ្ឋអាមេរិកអាចហាមឃាត់ការនាំចេញប្រេងម៉ាស៊ូត ដើម្បីកាត់បន្ថយតម្លៃដែលកំពុងឡើងខ្ពស់បំផុត ដែលអាចប៉ះពាល់ដល់ទិន្នផលចម្រាញ់ប្រេងរបស់អាមេរិក៕
