ទាហានម៉ារីនអាមេរិកចំនួន៨នាក់ បានរងរបួស បន្ទាប់ពីមីស៊ីលប្រភេទ cruise ប្រឆាំងនាវាចរណ៍របស់អ៊ីរ៉ង់បានបាញ់ចំនាវាដែលពួកគេកំពុងបំពេញភារកិច្ច នៅក្នុងច្រកសមុទ្រ Hormuz។
នេះបើយោងតាមការរាយការណ៍របស់ NBC News ដោយដកស្រង់សម្តីមន្ត្រីអាមេរិកចំនួន៣រូប។
ទាហានម៉ារីនទាំងនោះ មិនរងរបួសធ្ងន់ធ្ងរដល់អាយុជីវិតនោះទេ ប៉ុន្តែពួកគេបានរងផលប៉ះពាល់ពីការស្រូបផ្សែង និងអាចមានរបួសខួរក្បាល បន្ទាប់ពីជួបប្រទះរោគសញ្ញាស្រដៀងនឹងការប៉ះទង្គិចខួរក្បាល (concussion) រួមទាំងការឈឺក្បាលជាប់លាប់។
ក្រុមនេះមានសមាជិកជាទាហានថ្នាក់ក្រោមចំនួន៧នាក់ និងនាយទាហានម្នាក់ ដែលទាំងអស់កំពុងបម្រើការជាផ្នែកមួយនៃក្រុមចុះចតកងវរសេនាតូច (battalion landing team) នៅពេលការវាយប្រហារបានកើតឡើងកាលពីថ្ងៃទី១៤ ខែកញ្ញា។
មន្ត្រីនានាបានបញ្ជាក់ថា បុគ្គលិកទាំង ៨ នាក់បានត្រឡប់ទៅបំពេញភារកិច្ចវិញភ្លាមៗបន្ទាប់ពីការវាយប្រហារ។
មន្ត្រីទាំងនោះបានបញ្ជាក់ថា នាវាដែលរងការវាយប្រហារមិនមែនជាកប៉ាល់ចម្បាំងដែលបានចុះបញ្ជីជាផ្លូវការរបស់កងទ័ពជើងទឹកអាមេរិកនោះទេ ដោយពួកគេមិនបានបញ្ជាក់ពីប្រភេទ ឬទង់ជាតិរបស់នាវានោះឡើយ ហើយគ្រាន់តែហៅវាថាជានាវាចរណ៍សមុទ្រប៉ុណ្ណោះ។
ហេតុការណ៍នេះកើតឡើងស្របពេលដែលមានការត្រួតពិនិត្យយ៉ាងខ្លាំងលើការកត់ត្រាអំពីចំនួនអ្នករងគ្រោះរបស់ក្រសួងការពារជាតិ ចាប់តាំងពីជម្លោះរវាងអាមេរិក-អ៊ីស្រាអែល និងអ៊ីរ៉ង់បានផ្ទុះឡើងក្នុងខែកុម្ភៈមក។
ដោយតួលេខសរុបនៃយោធាដែលរងរបួស និងស្លាប់មានការកែសម្រួលជាបន្តបន្ទាប់នៅក្នុងការរាយការណ៍ និងការចាត់ថ្នាក់។
គិតត្រឹមថ្ងៃពុធ ប្រព័ន្ធវិភាគអ្នករងគ្រោះផ្នែកការពារជាតិ (DCAS) របស់មន្ទីរបញ្ចកោណ (Pentagon) បានកត់ត្រាជាផ្លូវការនូវយោធាអាមេរិកចំនួន ៨៦១ នាក់ដែលបានរងរបួសនៅក្នុងជម្លោះដ៏ទូលំទូលាយនេះ។
ទាហានម៉ារីនទាំង ៨ នាក់ត្រូវបានចុះឈ្មោះក្នុងមូលដ្ឋានទិន្នន័យផ្លូវការនៃអ្នករងគ្រោះ ជិត ១០ ថ្ងៃបន្ទាប់ពីការវាយប្រហារនៅថ្ងៃទី ១៤ ខែកញ្ញា។
មន្ត្រីការពារជាតិអាមេរិកម្នាក់បានលើកឡើងថា ការពន្យារពេលក្នុងការប្រកាសជាសាធារណៈនេះគឺដោយសារតែរោគសញ្ញាដែលមិនទាន់លេចចេញភ្លាមៗ ប៉ុន្តែច្រើនតែលេចឡើងនៅប៉ុន្មានថ្ងៃក្រោយមក ក៏ដូចជាដោយសារប្រព័ន្ធតាមដានអ្នករងគ្រោះខ្វះសមត្ថភាពក្នុងការរាយការណ៍ទិន្នន័យភ្លាមៗ (real-time)៕
