អ៊ីរ៉ង់បានអះអាងថា ការវាយប្រហារលើនាវានៅជិតច្រកសមុទ្រ Hormuz បានធ្វើឱ្យនាវាចម្បាំងអាមេរិកផ្លាស់ទីឆ្ងាយពីឆ្នេរអ៊ីរ៉ង់។ ការអះអាងនេះកើតឡើង ខណៈភាពតានតឹងរវាងអ៊ីរ៉ង់ និងអាមេរិកនៅតែបន្ត។
ប្រភពពីសារព័ត៌មានAl Jazeera នៅថ្ងៃទី២៩ខែកញ្ញា។
តាមប្រព័ន្ធផ្សព្វផ្សាយអាមេរិក ទាហានម៉ារីនអាមេរិក ៨នាក់បានរងផលប៉ះពាល់ពីផ្សែង និងអាចមានរបួសខួរក្បាល បន្ទាប់ពីនាវាដែលពួកគេស្ថិតនៅត្រូវបានវាយប្រហារដោយមីស៊ីលប្រឆាំងនាវារបស់អ៊ីរ៉ង់ កាលពីថ្ងៃទី១៤ ខែកញ្ញា។ ទោះជាយ៉ាងណា នាវានោះមិនមែនជានាវាចម្បាំងរបស់កងទ័ពជើងទឹកអាមេរិកទេ។
អ៊ីរ៉ង់ក៏អះអាងថា នាវាចម្បាំងអាមេរិកបានផ្លាស់ទីទៅតំបន់សមុទ្រអារ៉ាប់កណ្ដាល ដើម្បីជៀសវាងការវាយប្រហារដោយមីស៊ីល។ ប៉ុន្តែអាមេរិកនៅតែរក្សាការគ្រប់គ្រងផ្លូវសមុទ្រមួយចំនួននៅជុំវិញកំពង់ផែភាគខាងត្បូងអ៊ីរ៉ង់។
ទន្ទឹមនឹងភាពតានតឹងនេះ ការដឹកជញ្ជូនប្រេងតាម Hormuz បានកើនឡើងវិញ។ ទិន្នន័យ Kpler បង្ហាញថា ការនាំចេញប្រេងតាមច្រកនេះក្នុងខែកញ្ញា ត្រូវបានរំពឹងថាមានប្រហែល ៧,៤ លានបារ៉ែលក្នុងមួយថ្ងៃ ខណៈការនាំចេញប្រេងពីតំបន់មជ្ឈិមបូព៌ាសរុបបានកើនឡើងដល់កម្រិតខ្ពស់បំផុតចាប់តាំងពីសង្គ្រាមចាប់ផ្តើម។
ជាមួយគ្នានេះ អ្នកសម្របសម្រួលកំពុងព្យាយាមជំរុញឱ្យអ៊ីរ៉ង់ និងអាមេរិកបន្តការចរចា ដើម្បីបន្ថយភាពតានតឹង និងដោះស្រាយបញ្ហាច្រកសមុទ្រ Hormuz៕
