ក្រុមហ៊ុនដឹកប្រេងរដ្ឋរបស់អ៊ីរ៉ាក់ បានដឹកប្រេងឆៅអ៊ីរ៉ាក់ចំនួន២លានបារ៉ែល តាមនាវាដឹកប្រេងធំមួយ ឆ្លងកាត់ ច្រកសមុទ្រ Hormuz។ ក្រុមហ៊ុនបាននិយាយថា នេះជាលើកដំបូងក្នុងរយៈពេលជាច្រើនទសវត្សរ៍ ដែលខ្លួនធ្វើប្រតិបត្តិការបែបនេះ។
ប្រភពពីសារព័ត៌មានreuter នៅថ្ថៃទី៤ខែតុលា។
ការដឹកជញ្ជូនតាមច្រក Hormuz ជំនួសឱ្យការប្រគល់ប្រេងនៅកំពង់ផែ Basra អាចផ្តល់ភាពងាយស្រួលដល់ក្រុមហ៊ុនទីផ្សារប្រេងរដ្ឋអ៊ីរ៉ាក់ SOMO ក្នុងការជ្រើសរើសទីកន្លែងលក់ និងអាចរកបានតម្លៃល្អជាងមុន។
អ៊ីរ៉ាក់ក៏កំពុងព្យាយាមទិញ និងកាន់កាប់នាវាដឹកប្រេងឯកទេសបន្ថែម ដើម្បីពង្រីកកងនាវារបស់ខ្លួន និងប្រកួតប្រជែងជាមួយក្រុមហ៊ុនដឹកជញ្ជូនប្រេងក្នុងតំបន់។
អ៊ីរ៉ាក់បានទទួលការអនុញ្ញាតពីអ៊ីរ៉ង់ជាមុន សម្រាប់នាវាដឹកប្រេងរបស់ខ្លួនឆ្លងកាត់ Hormuz ខណៈច្រកនេះត្រូវបានអ៊ីរ៉ង់បិទយ៉ាងមានប្រសិទ្ធភាព ក្នុងអំឡុងជម្លោះជាមួយសហរដ្ឋអាមេរិក៕
