នាយករដ្ឋមន្ត្រីជប៉ុន អ្នកស្រីសាណាអេ តាកាអ៊ីជី បានបញ្ជូនសារថា ជប៉ុនចង់រក្សាទំនាក់ទំនងដែលមានស្ថិរភាពជាមួយចិន បន្ទាប់ពីប្រទេសទាំងពីរមានភាពតានតឹងអស់រយៈពេលជិតមួយឆ្នាំ។
ប្រភពពីសារព័ត៌មានCNA នៅថ្ងៃទី៧ខែតុលា។
ក្នុងសុន្ទរកថាគោលនយោបាយនៅសភា កាលពីថ្ងៃទី៥ ខែតុលា លោកស្រី តាកាអ៊ីជី បានហៅចិនថា «ប្រទេសជិតខាងដ៏សំខាន់» និងនិយាយថា រដ្ឋាភិបាលជប៉ុននឹងពង្រឹងការទំនាក់ទំនង ការពិភាក្សា និងកិច្ចសហការលើបញ្ហាដែលប្រទេសទាំងពីរមានផលប្រយោជន៍រួម។
ទោះជាយ៉ាងណា លោកស្រីក៏បានបញ្ជាក់ពីការព្រួយបារម្ភរបស់ជប៉ុនចំពោះសកម្មភាពយោធារបស់ចិននៅជុំវិញជប៉ុន និងជម្លោះនៅសមុទ្រចិនខាងកើត និងសមុទ្រចិនខាងត្បូង។
គួរឱ្យកត់សម្គាល់ថា លោកស្រីមិនបាននិយាយពី តៃវ៉ាន់ ក្នុងសុន្ទរកថានោះទេ។ អ្នកជំនាញយល់ថា ការមិនលើកឡើងពីតៃវ៉ាន់ មិនមានន័យថាជប៉ុនបានផ្លាស់ប្តូរគោលនយោបាយរបស់ខ្លួនចំពោះតៃវ៉ាន់ឡើយ។ វាអាចជាការបង្ហាញថា ជប៉ុនកំពុងព្យាយាមបន្ថយភាពតានតឹង និងសាកល្បងលទ្ធភាពធ្វើឱ្យទំនាក់ទំនងជាមួយចិនប្រសើរឡើង។
យ៉ាងណាក៏ដោយ អ្នកវិភាគថា ឧបសគ្គនៅតែមានច្រើន មុនពេលទំនាក់ទំនងជប៉ុន-ចិនអាចវិលទៅរកភាពប្រក្រតីបាន៕
