ក្រុមហ៊ូធីនៅយេម៉ែន អះអាងថាខ្លួនបានប្រើដ្រូននិងមីស៊ីលបាលីស្ទិកទៅលើអាកាសយានដ្ឋាន និងមូលដ្ឋានយោធាជាច្រើនកន្លែងក្នុងប្រទេសអារ៉ាប៊ីសាអូឌីត នៅថ្ងៃទី៧ ខែតុលា។
ប្រភពពីសារព័ត៌មានAA news។
អ្នកនាំពាក្យយោធាហ៊ូធី លោក Yahya Saree បាននិយាយថា ក្រុមនេះបានវាយប្រហារ អាកាសយានដ្ឋានអន្តរជាតិ King Khalid ក្នុងទីក្រុងរីយ៉ាដ ដោយប្រើដ្រូនជាច្រើនគ្រឿង ហើយអះអាងថា ការវាយប្រហារបានរំខានដល់ចរាចរណ៍ផ្លូវអាកាស។
លោកក៏អះអាងថា ហ៊ូធីបានវាយប្រហារ អាកាសយានដ្ឋាន Abha និងមូលដ្ឋានទ័ពអាកាស Khamis Mushait ដោយប្រើមីស៊ីល និងដ្រូន ព្រមទាំងវាយប្រហារជំរំយោធាចំនួន៣កន្លែងនៅតំបន់ Jizan និង Asir។
ជាមួយគ្នានេះ ក្រុមចម្រុះដឹកនាំដោយអារ៉ាប៊ីសាអូឌីត បាននិយាយថា ខ្លួនបាន ស្ទាក់ចាប់ និងបំផ្លាញមីស៊ីលបាលីស្ទិកមួយគ្រាប់ ដែលហ៊ូធីបាញ់សំដៅទៅតំបន់រីយ៉ាដ។
ក្រុមចម្រុះក៏អះអាងថា បានរកឃើញទីតាំងបាញ់មីស៊ីលនៅលើមេឃជុំវិញទីក្រុងសាណា រដ្ឋធានីយេម៉ែន ហើយនិយាយថា ខ្លួននឹងបន្តតាមដាន និងបំផ្លាញទីតាំងនោះ៕

