ប្រទេសបារាំង បានប្រកាសពីឆន្ទៈក្នុងការជួយការពារហេដ្ឋារចនាសម្ព័ន្ធថាមពលរបស់ប្រទេសអារ៉ាប៊ីសាអូឌីត ដោយផ្តោតលើការការពារជាចម្បង បន្ទាប់ពីមានការវាយប្រហារកើនឡើងនៅក្នុងតំបន់។
ប្រភពពីសារព័ត៌មានAA news នៅថ្ងៃទី៩ខែតុលា។
ក្រសួងការបរទេសបារាំងបានបញ្ជាក់កាលពីថ្ងៃទី៨ ខែតុលា ថា បារាំងឈរជាមួយអារ៉ាប៊ីសាអូឌីត និងថ្កោលទោសការវាយប្រហាររបស់ក្រុមហ៊ូទីនៅប្រទេសយេម៉ែន។ តំបន់ដែលបារាំងមានបំណងជួយការពារ រួមមានទីក្រុងយ៉ាន់ប៊ូ និងបំពង់បង្ហូរប្រេងពីភាគខាងកើតទៅភាគខាងលិចរបស់អារ៉ាប៊ីសាអូឌីត។
ការប្រកាសនេះធ្វើឡើងបន្ទាប់ពីអារ៉ាប៊ីសាអូឌីតរាយការណ៍ថា មនុស្ស៣នាក់បានស្លាប់ក្នុងការវាយប្រហារលើអាកាសយានដ្ឋានកាលពីថ្ងៃពុធ រួមទាំងអាកាសយានដ្ឋានមួយនៅរដ្ឋធានីរីយ៉ាដ។
ចំពោះច្រកសមុទ្រហ័រមូស បារាំងបានអំពាវនាវឱ្យសហគមន៍អន្តរជាតិគោរពច្បាប់អន្តរជាតិ និងសហការគ្នាដើម្បីស្តារចរាចរណ៍ដឹកជញ្ជូនតាមផ្លូវសមុទ្រឡើងវិញ។
បារាំងក៏កំពុងចូលរួមក្នុងប្រតិបត្តិការរបស់សហភាពអឺរ៉ុបឈ្មោះ Aspides ដើម្បីការពារសន្តិសុខដែនសមុទ្រក្នុងតំបន់ ហើយបានបញ្ជាក់ថា នឹងបន្តគាំទ្រប្រតិបត្តិការនេះ ស្របតាមស្ថានភាពសន្តិសុខក្នុងតំបន់៕
