កាលពីថ្ងៃព្រហស្បតិ៍ ទី៨ ខែតុលា ឆ្នាំ២០២៦ នាវាផ្ទុកយន្តហោះចម្បាំង USS Abraham Lincoln របស់សហរដ្ឋអាមេរិក បានត្រឡប់ទៅកាន់មូលដ្ឋានទ័ពជើងទឹកនៅទីក្រុងសានឌីអេហ្គោវិញ បន្ទាប់ពីបំពេញបេសកកម្មយោធារយៈពេល៣២១ថ្ងៃ រួមទាំងការចូលរួមក្នុងសង្គ្រាមរវាងសហរដ្ឋអាមេរិក អ៊ីស្រាអែល និងអ៊ីរ៉ង់។
ប្រភពពីសារព័ត៌មានAA news។
យោងតាមសារព័ត៌មាន USNI News នាវានេះបានបំបែកកំណត់ត្រាដោយស្ថិតនៅសមុទ្រជាប់គ្នារយៈពេល២៦៥ថ្ងៃ ដោយមិនចូលចតនៅកំពង់ផែណាមួយឡើយ។ នាវានេះមាននាវិក និងកងម៉ារីនប្រមាណ៥.០០០នាក់។
កាលពីថ្ងៃពុធ រដ្ឋមន្ត្រីការពារជាតិអាមេរិក លោក Pete Hegseth បានឡើងលើនាវា និងប្រគល់មេដាយកិត្តិយសប្រធានាធិបតីសម្រាប់អង្គភាពយោធា ដើម្បីទទួលស្គាល់តួនាទីរបស់នាវានេះក្នុងប្រតិបត្តិការយោធា Epic Fury។
នាវា USS Abraham Lincoln បានចាកចេញពីទីក្រុងសានឌីអេហ្គោកាលពីខែវិច្ឆិកា ឆ្នាំ២០២៥ ដើម្បីបំពេញបេសកកម្មនៅតំបន់មហាសមុទ្រប៉ាស៊ីហ្វិក ប៉ុន្តែត្រូវបានបញ្ជូនទៅកាន់តំបន់មជ្ឈិមបូព៌ា បន្ទាប់ពីសហរដ្ឋអាមេរិក និងអ៊ីស្រាអែលចាប់ផ្តើមសង្គ្រាមជាមួយអ៊ីរ៉ង់ កាលពីថ្ងៃទី២៨ ខែកុម្ភៈ ឆ្នាំ២០២៦។
កាលពីរដូវក្តៅកន្លងទៅ សារព័ត៌មានមួយចំនួនបានរាយការណ៍ពីការខ្វះខាតអាហារ និងសម្ភារៈចាំបាច់ ព្រមទាំងការធ្លាក់ចុះនៃស្មារតី និងសុខុមាលភាពផ្លូវចិត្តរបស់នាវិក។ ក៏មានរបាយការណ៍ថា នាវិកពីរនាក់បានព្យាយាមលោតចេញពីនាវាចូលទៅក្នុងសមុទ្រផងដែរ៕
