មេដឹកនាំកូរ៉េខាងជើង លោក គីម ជុងអ៊ុន បានវិលត្រឡប់ទៅប្រទេសរបស់ខ្លួនវិញ កាលពីថ្ងៃសៅរ៍ទី២៤ ខែតុលា ឆ្នាំ២០២៦ បន្ទាប់ពីបំពេញទស្សនកិច្ចរយៈពេលមួយថ្ងៃនៅទីក្រុង ដាន់ទុង (Dandong) ជាប់ព្រំដែនប្រទេសចិន។
សារព័ត៌មានCNA។
តាមប្រព័ន្ធផ្សព្វផ្សាយរដ្ឋកូរ៉េខាងជើង លោក គីម បានប្តេជ្ញាថានឹងបន្តពង្រឹងមិត្តភាពរវាងប្រទេសទាំងពីរឱ្យកាន់តែរឹងមាំ។ ក្នុងដំណើរទស្សនកិច្ចនេះ លោកបានទៅទស្សនាសារមន្ទីររំលឹកដល់ទាហានចិនដែលបានស្លាប់ក្នុងសង្គ្រាមកូរ៉េឆ្នាំ១៩៥០-១៩៥៣ និងបានជួបពិភាក្សាជាមួយលោក វ៉ាង ហ៊ូនីង ដែលជាទីប្រឹក្សានយោបាយជាន់ខ្ពស់របស់ប្រទេសចិន។
ដំណើរទស្សនកិច្ចនេះធ្វើឡើងបន្ទាប់ពីស្ពានដ៏សំខាន់មួយដែលតភ្ជាប់ប្រទេសចិន និងកូរ៉េខាងជើង បានបើកដំណើរការជាផ្លូវការកាលពីសប្តាហ៍មុន បើទោះបីជាស្ពាននេះបានសាងសង់រួចតាំងពី ១២ ឆ្នាំមុនក៏ដោយ។ ការបើកស្ពាននេះត្រូវបានគេរំពឹងថា នឹងជួយពង្រឹងទំនាក់ទំនងពាណិជ្ជកម្មរវាងប្រទេសទាំងពីរ។
ទោះជាយ៉ាងណា ប្រទេសទាំងពីរមិនបានប្រកាសជាមុនអំពីដំណើរទស្សនកិច្ចរបស់លោក គីម នោះទេ ហើយក៏មិនទាន់មានការបញ្ជាក់ច្បាស់លាស់អំពីគោលបំណង និងលទ្ធផលនៃដំណើរទស្សនកិច្ចនេះដែរ។
ប្រទេសចិនគឺជាដៃគូពាណិជ្ជកម្មធំបំផុតរបស់កូរ៉េខាងជើង និងជាប្រភពសំខាន់នៃការគាំទ្រផ្នែកសេដ្ឋកិច្ច នយោបាយ និងការទូត សម្រាប់រដ្ឋាភិបាលក្រុងព្យុងយ៉ាង៕
