សម្ព័ន្ធយោធាដឹកនាំដោយប្រទេសអារ៉ាប៊ីសាអូឌីត បានប្រកាសថា ខ្លួនបានស្ទាក់ចាប់និងបំផ្លាញមីស៊ីលបាលីស្ទិកមួយគ្រាប់ ដែលក្រុមហ៊ូទីបាញ់សំដៅទៅទីក្រុងតៃហ្វ ភាគខាងលិចប្រទេសអារ៉ាប៊ីសាអូឌីត នៅព្រឹកថ្ងៃពុធ ទី២៨ ខែតុលា ឆ្នាំ២០២៦។
សារព័ត៌មានAnadolu Agency។
អាជ្ញាធរក៏បានចេញការជូនដំណឹងអាសន្ននៅទីក្រុងជេដដា និងយ៉ាន់ប៊ូផងដែរ។ ក្រោយមក អាជ្ញាធរការពារជនស៊ីវិលបានប្រកាសថា ស្ថានការណ៍នៅតំបន់ទាំងពីរមានសុវត្ថិភាពឡើងវិញ ប៉ុន្តែមិនបានបញ្ជាក់ពីមូលហេតុនៃការជូនដំណឹងនោះទេ។
កាលពីយប់ថ្ងៃអង្គារ កម្ទេចមីស៊ីលពីរគ្រាប់ដែលប្រព័ន្ធការពារដែនអាកាសបានស្ទាក់ចាប់ បានធ្លាក់បង្កការខូចខាតដល់អគារ ការដ្ឋានសំណង់ និងរថយន្តមួយគ្រឿងនៅទីក្រុងរីយ៉ាដ។ ទោះជាយ៉ាងណា មិនមានសេចក្តីរាយការណ៍អំពីអ្នកស្លាប់ ឬរបួសឡើយ។
កាលពីថ្ងៃអង្គារដូចគ្នា សម្ព័ន្ធយោធានេះក៏បានប្រកាសថា បានស្ទាក់ចាប់ដ្រូនចំនួន ៤ គ្រឿង និងមីស៊ីលបាលីស្ទិកចំនួន ៣ គ្រាប់ ដែលក្រុមហ៊ូទីបាញ់សំដៅមកកាន់ប្រទេសអារ៉ាប៊ីសាអូឌីត។
ការវាយប្រហារនេះកើតឡើង ខណៈភាពតានតឹងរវាងក្រុមហ៊ូទី និងសម្ព័ន្ធយោធាដឹកនាំដោយអារ៉ាប៊ីសាអូឌីតកំពុងកើនឡើង។ អារ៉ាប៊ីសាអូឌីតបានដឹកនាំសម្ព័ន្ធយោធាប្រយុទ្ធប្រឆាំងនឹងក្រុមហ៊ូទី ចាប់តាំងពីខែមីនា ឆ្នាំ២០១៥ បន្ទាប់ពីក្រុមនេះបានដណ្តើមកាន់កាប់រដ្ឋធានីសាណា និងតំបន់ផ្សេងៗក្នុងប្រទេសយេម៉ែន កាលពីឆ្នាំ២០១៤៕
