កងទ័ពអ៊ីស្រាអែល បានប្រកាសដាក់តំបន់អេន ឌៀរ បាហា (Ain Deir Baha) ក្នុងទីក្រុងហេប្រុន តំបន់វេសប៊ែង ក្រោមការបិទជាតំបន់យោធា កាលពីថ្ងៃសុក្រ ទី៣០ ខែតុលា ឆ្នាំ២០២៦ ខណៈកងទ័ពបន្តចុះឆែកឆេរផ្ទះប្រជាជន និងចាប់ខ្លួនយុវជនប៉ាឡេស្ទីនជាច្រើននាក់។
ប្រភពពីសារព័ត៌មានAnadolu Agency។
ប្រតិបត្តិការយោធារបស់អ៊ីស្រាអែលនៅទីក្រុងហេប្រុនបានឈានចូលដល់ថ្ងៃទី៨ ដោយបានបង្ខំឱ្យប្រជាជនប៉ាឡេស្ទីនរាប់ពាន់នាក់ចាកចេញពីផ្ទះសម្បែង និងបណ្តាលឱ្យមានការបំផ្លាញផ្ទះ និងហេដ្ឋារចនាសម្ព័ន្ធជាច្រើន។
តាមអាជ្ញាធរក្រុងហេប្រុន ប្រជាជនប៉ាឡេស្ទីនចំនួន ៤.៩៦៩នាក់ មកពី ៧៨០គ្រួសារ ត្រូវបានបង្ខំឱ្យភៀសខ្លួន។ ចំណែកក្លឹបអ្នកទោសប៉ាឡេស្ទីនបានឱ្យដឹងថា កងកម្លាំងអ៊ីស្រាអែលបានចាប់ខ្លួនប្រជាជនចំនួន ១១០នាក់ នៅក្នុងតំបន់ហេប្រុន ចាប់ពីថ្ងៃសុក្រដល់ថ្ងៃពុធ។
ក្រៅពីនេះ ការបិទតំបន់យោធាបានប៉ះពាល់ដល់ការសិក្សារបស់សិស្សចំនួន ២.៨៧២នាក់ នៅតាមសាលារៀនចំនួន ៦៦កន្លែង។ ក្នុងនោះ សិស្ស ២.១៩៨នាក់ កំពុងស្ថិតក្រោមការឡោមព័ទ្ធដោយផ្ទាល់ ខណៈសិស្ស ៦៧៤នាក់ទៀតត្រូវបានបង្ខំឱ្យផ្លាស់ទីលំនៅ និងមិនអាចទៅសាលារៀនបាន។
គួរបញ្ជាក់ថា អ៊ីស្រាអែលបានចាប់ផ្តើមប្រតិបត្តិការយោធានេះកាលពីថ្ងៃទី២៣ ខែតុលា បន្ទាប់ពីមានការបាញ់ប្រហារមួយដែលបណ្តាលឱ្យទាហានអ៊ីស្រាអែល ២នាក់ស្លាប់ និង ៣នាក់រងរបួស។ បច្ចុប្បន្ន ប្រជាជនប៉ាឡេស្ទីនដែលបានភៀសខ្លួនកំពុងទាមទារឱ្យអ៊ីស្រាអែលបញ្ចប់ការបិទខ្ទប់ និងអនុញ្ញាតឱ្យពួកគេត្រឡប់ទៅផ្ទះវិញ៕
