ស្ថានីយវិទ្យុBlu Radio របស់កូឡុំប៊ី បានរាយការណ៍កាលពីថ្ងៃសៅរ៍ទី៣១.១០.២០២៦ថា មនុស្សយ៉ាងហោចណាស់១៩ នាក់ត្រូវបានសម្លាប់ ដោយសារកងទ័ពវេណេស៊ុយអេឡា ទម្លាក់គ្រាប់បែកលើជំរុំមួយរបស់ក្រុម«កងទ័ពរំដោះជាតិ»(National Liberation Army ឬELN) នៅជិតព្រំដែនកូឡុំប៊ី។
សារព័ត៌មានAnadolu។
យោងតាមលោក Juan Francisco Garcia Escalona អតីតសមាជិកសភាវេណេស៊ុយអេឡា ការវាយប្រហារនេះ បានកើតឡើងកាលពីថ្ងៃសុក្រ នៅតំបន់ Buena Vista del Meta ក្នុងរដ្ឋ Apure ដែលស្ថិតនៅជិតព្រំដែន។
លោក Garcia Escalona ដែលជាអ្នកសម្របសម្រួលអង្គការសិទ្ធិមនុស្ស Fundaredes នៅក្នុងរដ្ឋ Apure បាននិយាយថា លោកទទួលបានសក្ខីកម្មអំពីប្រតិបត្តិការយោធាមួយនៅក្នុងតំបន់នោះ។
យោងតាមព័ត៌មានបឋម សាកសពចំនួន៩ត្រូវបានគេរាយការណ៍ថា ត្រូវបានបញ្ជូនទៅកាន់ទីក្រុង San Fernando de Apure ដែលជារដ្ឋធានីនៃរដ្ឋនោះ ដើម្បីធ្វើការពិនិត្យកោសល្យវិច័យ។
សាកសពចំនួន ១០ផ្សេងទៀត ត្រូវបានគេរាយការណ៍ថា នៅតែបន្តស្ថិតនៅកន្លែងកើតហេតុ។
ខណៈដែលមនុស្សមួយចំនួន (មិនទាន់ដឹងចំនួនច្បាស់លាស់)ដែលរងរបួស ត្រូវបានគេនិយាយថា បានឆ្លងដែនចូលទៅក្នុងទឹកដីកូឡុំប៊ី។
ស្ថានីយវិទ្យុ Blu Radio បានរាយការណ៍ថា ប្រជាពលរដ្ឋនៅតំបន់ Puerto Paez ក៏បានផ្តល់ឈ្មោះ និងព័ត៌មានអត្តសញ្ញាណមួយចំនួន ដែលត្រូវបានគេរកឃើញនៅកន្លែងកើតហេតុផងដែរ។ ទោះជាយ៉ាងណាក៏ដោយ អត្តសញ្ញាណរបស់ជនរងគ្រោះទាំងនោះ មិនទាន់ត្រូវបានបញ្ជាក់ជាផ្លូវការនៅឡើយទេ។
លោកស្រី Rocio San Miguel សកម្មជនសិទ្ធិមនុស្សវេណេស៊ុយអេឡា និងជាអ្នកជំនាញផ្នែកកិច្ចការយោធា ក៏បានលើកឡើងអំពីរបាយការណ៍ស្តីពីការទម្លាក់គ្រាប់បែកលើជំរុំក្រុម ELN នៅ Buena Vista del Meta ផងដែរ តាមរយៈការបង្ហោះនៅលើបណ្តាញសង្គម X(របស់សហរដ្ឋអាមេរិក)។
ប្រតិបត្តិការដែលត្រូវបានរាយការណ៍នេះ កើតឡើងចំពេលដែលមានសេចក្តីរាយការណ៍អំពីការប៉ះទង្គិចគ្នាដោយអាវុធ នៅក្នុងតំបន់ព្រំដែនមួយចំនួនរបស់វេណេស៊ុយអេឡា អំឡុងប៉ុន្មានសប្តាហ៍ថ្មីៗនេះ។
លោក Garcia Escalona បាននិយាយថា ប្រជាពលរដ្ឋ និងសហគមន៍ជនជាតិដើមភាគតិច បានរាយការណ៍អំពីការប្រយុទ្ធគ្នានៅតំបន់ Los Pijiguaos ក្នុងផ្នែកខាងលិចនៃរដ្ឋ Bolivar និងនៅជិតតំបន់ Paso del Burro តាមបណ្តោយព្រំដែនទន្លេ Meta-Orinoco។
លោកបានផ្សារ ភ្ជាប់ការប៉ះទង្គិចទាំងនេះ ទៅនឹងជម្លោះដណ្តើមការគ្រប់គ្រងលើតំបន់ដែលត្រូវបានប្រើប្រាស់សម្រាប់ការរុករករ៉ែ រួមទាំងរ៉ែបុកស៊ីត (bauxite)និងរ៉ែខូលតាន់ (coltan)។
ស្ថានីយវិទ្យុ Blu Radio បានរាយការណ៍ថា រដ្ឋាភិបាលបណ្តោះអាសន្នរបស់វេណេស៊ុយអេឡា ដែលដឹកនាំដោយលោកស្រី Delcy Rodriguez មិនទាន់បានចេញសេចក្តីថ្លែងការណ៍ណាមួយ ពាក់ព័ន្ធនឹងការចោទប្រកាន់អំពីការទម្លាក់គ្រាប់បែកនេះនៅឡើយទេ៕
