អ៊ីស្រាអែល វាយប្រហារលើតំបន់វេសប៊ែង ស្លាប់ជនប៉ាឡេស្ទីនម្នាក់និងម្នាក់ទៀតរងរបួស!

បុរសជនជាតិប៉ាឡេស្ទីនម្នាក់បានស្លាប់ និងម្នាក់ទៀតរងរបួស បន្ទាប់ពីឆ្មាំការពារនៅតំបន់តាំងទីលំនៅរបស់អ៊ីស្រាអែលបានបើកការបាញ់ប្រហារ កាលពីល្ងាចថ្ងៃសុក្រ ទី២០ ខែវិច្ឆិកា ឆ្នាំ២០២៦ នៅជិតភូមិ Dura al-Qara ភាគឦសានទីក្រុងរ៉ាម៉ាឡា ក្នុងតំបន់វេសប៊ែងដែលអ៊ីស្រាអែលកំពុងកាន់កាប់។

សារព័ត៌មានAnadolu Agency។

តាមវិទ្យុផ្លូវការប៉ាឡេស្ទីនបានឱ្យដឹងថា ជនរងគ្រោះដែលស្លាប់មានឈ្មោះ Hamza Masoud Salim Abdo អាយុ៤២ឆ្នាំ។ អាជ្ញាធរអ៊ីស្រាអែលបានរក្សាទុកសាកសពរបស់លោក មិនទាន់ប្រគល់ឱ្យក្រុមគ្រួសារនៅឡើយ។

មុនពេលមានការបញ្ជាក់ពីការស្លាប់នេះ ទីភ្នាក់ងារព័ត៌មាន WAFA របស់ប៉ាឡេស្ទីនបានរាយការណ៍ថា មានបុរសពីរនាក់ត្រូវបានឆ្មាំការពារនៅតំបន់តាំងទីលំនៅអ៊ីស្រាអែលបាញ់ឱ្យរងរបួស ហើយក្រោយមកកងកម្លាំងអ៊ីស្រាអែលបានឃាត់ខ្លួនអ្នកទាំងពីរ។ ស្ថានភាពរបស់អ្នករងរបួសម្នាក់ទៀតមិនទាន់ត្រូវបានបញ្ជាក់នៅឡើយទេ។

ហេតុការណ៍នេះកើតឡើងក្នុងពេលដែលការវាយប្រហាររបស់កងកម្លាំងអ៊ីស្រាអែល និងអ្នកតាំងទីលំនៅអ៊ីស្រាអែលប្រឆាំងនឹងប្រជាជនប៉ាឡេស្ទីននៅតំបន់វេសប៊ែង និងក្រុងហ្សេរុយសាឡឹមខាងកើត កំពុងកើនឡើង។

យោងតាមគណៈកម្មការប៉ាឡេស្ទីនទទួលបន្ទុកការតាំងទីលំនៅ និងការតស៊ូប្រឆាំងនឹងជញ្ជាំង បានឱ្យដឹងថា ក្នុងខែតុលាតែមួយ កងកម្លាំងអ៊ីស្រាអែល និងអ្នកតាំងទីលំនៅបានធ្វើការវាយប្រហារជាង ៣.១៣៣លើក លើប្រជាជនប៉ាឡេស្ទីន និងទ្រព្យសម្បត្តិរបស់ពួកគេ។

ក្នុងចំណោមនោះ ការវាយប្រហារចំនួន ១.៣៦៩លើក ត្រូវបានប្រព្រឹត្តដោយអ្នកតាំងទីលំនៅអ៊ីស្រាអែល ដែលភាគច្រើនកើតឡើងនៅតំបន់រ៉ាម៉ាឡា ណាប្លុស និងហេប្រុន។

ការវាយប្រហារទាំងនេះរួមមាន ការបាញ់ប្រហារ ការប្រើអំពើហិង្សាលើប្រជាជន ការវាយប្រហារលើផ្ទះសម្បែង ដីកសិកម្ម និងទ្រព្យសម្បត្តិផ្សេងៗ ព្រមទាំងការឆ្មក់ចូល និងចាប់ខ្លួនប្រជាជនដោយកងទ័ពអ៊ីស្រាអែលផងដែរ៕

Leave a Reply

Your email address will not be published. Required fields are marked *