កងកម្លាំងអ៊ីស្រាអែល បានបន្តប្រតិបត្តិការវាយប្រហាររបស់ខ្លួននៅក្នុងតំបន់ហ្គាហ្សា និងតំបន់វេស្តប៊ែង (West Bank) ទោះបីជាមានបទឈប់បាញ់សម្របសម្រួលដោយសហរដ្ឋអាមេរិកក៏ដោយ។
ការវាយប្រហារថ្មីៗនេះបានបណ្ដាលឲ្យមនុស្សយ៉ាងហោចណាស់បីនាក់ស្លាប់ក្នុងរយៈពេល ២៤ ម៉ោងចុងក្រោយនេះ បើតាមការបញ្ជាក់របស់មន្ត្រីប៉ាឡេស្ទីន។
ប្រភពពីសារព័ត៌មានAl Jazeera កាលពីថ្ងៃទី 11 ខែវិច្ឆិកា ឆ្នាំ 2025។
ក្រសួងសុខាភិបាលហ្គាហ្សាបានបញ្ជាក់ថា ការវាយប្រហាររបស់អ៊ីស្រាអែលកើតឡើងជាបន្តបន្ទាប់ ពេលដែលក្រុមជនស៊ីវិលនៅតំបន់នេះកំពុងព្យាយាមរស់នៅក្រោមស្ថានភាពអស្ថិរភាពនយោបាយ និងសង្គ្រាមយូរឆ្នាំ។ ក្នុងសេចក្តីថ្លែងការណ៍ដែលផ្សាយនៅលើបណ្តាញ Telegram ទីភ្នាក់ងារការពារជនស៊ីវិលបាននិយាយថា សាកសពជនជាតិប៉ាឡេស្ទីនមិនស្គាល់អត្តសញ្ញាណចំនួន ៣៥ នាក់ ត្រូវបានផ្ទេរទៅមន្ទីរពេទ្យ al-Shifa ដើម្បីធ្វើការសម្គាល់អត្តសញ្ញាណបន្ថែម។
ជាប្រវត្តិសាស្ត្រសង្ខេប ការវាយប្រហាររបស់អ៊ីស្រាអែលលើហ្គាហ្សាបាននាំឲ្យមានការស្លាប់ច្រើនជាង ៦៩,០០០ នាក់ ចាប់តាំងពីការចាប់ផ្តើមសង្គ្រាមនៅខែតុលា ឆ្នាំ ២០២៣។ ក្នុងចំណោមនេះ មានយ៉ាងហោចណាស់ ៦៩,១៨២ នាក់ត្រូវបានសម្លាប់ និងជាង ១៧០,៦៩៤ នាក់រងរបួស។ បន្ថែមពីនេះ កងកម្លាំងអ៊ីស្រាអែលត្រូវបានចោទថា បានសម្លាប់ជនជាតិប៉ាឡេស្ទីន ជាង ២៤៥ នាក់ បន្ទាប់ពីបទឈប់បាញ់មានប្រសិទ្ធភាពនៅថ្ងៃទី ១០ ខែតុលា។
មន្ត្រីសុខាភិបាលក្នុងហ្គាហ្សាបាននិយាយថា ស្ថានភាពនៅតែធ្ងន់ធ្ងរ ខណៈដែលមន្ទីរពេទ្យជាច្រើនពិបាកទទួលអ្នករងរបួសថ្មីៗដោយសារកង្វះថាមពល និងឧបករណ៍វេជ្ជសាស្ត្រ៕