គ្រិស្តបរិស័ទប៉ាឡេស្ទីនបានអបអរបុណ្យណូអែលនៅឆ្នាំនេះ ក្រោមស្ថានភាពពិបាកធ្ងន់ធ្ងរ ដោយសារការកាន់កាប់ និងការវាយប្រហាររបស់អ៊ីស្រាអែល ដែលបន្តប៉ះពាល់ដល់ជីវិត សុវត្ថិភាព និងសិទ្ធិមូលដ្ឋានរបស់ពួកគេ។ នៅទីក្រុងបេថ្លេហិម គ្រិស្តបរិស័ទបានប្រមូលផ្តុំគ្នានៅព្រះវិហារ Nativity ជាលើកដំបូង ចាប់តាំងពីសង្គ្រាមនៅហ្គាហ្សាបានផ្ទុះឡើងនៅឆ្នាំ 2023 ដើម្បីអធិស្ឋាន និងរំលឹកអំពីសន្តិភាព បើទោះបីជាក្តីព្រួយបារម្ភនៅតែគ្របដណ្តប់លើសហគមន៍ក៏ដោយ។
ប្រភពពីសារព័ត៌មានAl Jazeera នៅថ្ងៃទី២៥ខែធ្នូ។
យោងតាមទិន្នន័យ គ្រិស្តបរិស័ទនៅក្នុងតំបន់ West Bank, East Jerusalem និង Gaza ឥឡូវនេះមានតិចជាង 50,000 នាក់ ប្រៀបធៀបនឹងដើមសតវត្សរ៍ទី 20 ដែលពួកគេធ្លាប់មានប្រហែល 12 ភាគរយនៃប្រជាជនសរុប។ ការកាន់កាប់ខុសច្បាប់ ការតាំងទីលំនៅរបស់អ្នកតាំងលំនៅអ៊ីស្រាអែល ចំណុចត្រួតពិនិត្យ និងជញ្ជាំងបំបែក បានធ្វើឱ្យសហគមន៍គ្រិស្តបរិស័ទរងការលំបាកផ្នែកសេដ្ឋកិច្ច និងសង្គម ជំរុញឱ្យមនុស្សជាច្រើនអន្តោប្រវេសន៍ទៅរស់នៅបរទេស។
នៅក្នុងតំបន់ហ្គាហ្សា និងទីក្រុងនានា ការវាយប្រហាររបស់អ៊ីស្រាអែលបានប៉ះពាល់ដល់ព្រះវិហារ និងប្រជាជនស៊ីវិល រួមទាំងការសម្លាប់គ្រិស្តបរិស័ទប៉ាឡេស្ទីនមួយចំនួន ដែលបានបង្កឱ្យមានការថ្កោលទោសពីសហគមន៍អន្តរជាតិ។ ទោះជាយ៉ាងណា គ្រិស្តបរិស័ទប៉ាឡេស្ទីននៅតែបន្តរក្សាជំនឿ និងអធិស្ឋានសម្រាប់សន្តិភាព យុត្តិធម៌ និងអនាគតដែលមានសុវត្ថិភាពលើដីកំណើតប្រវត្តិសាស្ត្ររបស់ពួកគេ៕