លោក Tarique Rahman មេដឹកនាំគណបក្សប្រឆាំងដ៏មានឥទ្ធិពលរបស់ប្រទេសបង់ក្លាដែស និងជាប្រធានស្តីទីនៃគណបក្សជាតិនិយមបង់ក្លាដែស (BNP) បានវិលត្រឡប់មកប្រទេសវិញ បន្ទាប់ពីនិរទេសខ្លួនអស់រយៈពេលជិត 17 ឆ្នាំ នៅចក្រភពអង់គ្លេស។
ប្រភពពីសារព័ត៌មឆនAl Jazeera នៅថ្ងៃទី២៥ខែធ្នូ។
លោក Rahman អាយុ 60 ឆ្នាំ បានមកដល់ទីក្រុងដាកា ក្រោមការយាមកាមយ៉ាងតឹងរ៉ឹង ខណៈអ្នកគាំទ្ររាប់សែននាក់បានចូលរួមស្វាគមន៍ ដោយគ្រវីទង់ជាតិគណបក្ស និងស្រែកពាក្យស្លោកគាំទ្រ។ គណបក្ស BNP បានអះអាងថា ការស្វាគមន៍នេះជាការកៀរគរដ៏ធំបំផុតមួយក្នុងប្រវត្តិសាស្ត្ររបស់ខ្លួន។
ក្នុងនាមជាអ្នកស្នងមរតកនយោបាយរបស់អតីតនាយករដ្ឋមន្ត្រី Khaleda Zia ដែលកំពុងមានជំងឺ លោក Tarique Rahman ត្រូវបានគេមើលឃើញថាជាបេក្ខជននាយករដ្ឋមន្ត្រីដ៏មានឱកាសខ្ពស់បំផុតរបស់ BNP។ ការវិលត្រឡប់របស់លោកកើតឡើងក្នុងបរិបទនយោបាយមិនប្រាកដប្រជា បន្ទាប់ពីការទម្លាក់មេដឹកនាំយូរអង្វែង Sheikh Hasina ក្នុងឆ្នាំ 2024។
អ្នកវិភាគនយោបាយបានលើកឡើងថា ការមកដល់របស់លោក Rahman អាចបំពេញចន្លោះប្រហោងភាពដឹកនាំក្នុងគណបក្ស BNP និងអាចផ្លាស់ប្តូរទិសដៅនយោបាយរបស់ប្រទេសបង់ក្លាដែស នៅមុនការបោះឆ្នោតដ៏សំខាន់ខាងមុខនេះ៕