(ភ្នំពេញ)៖ មានការអះអាងថា លោក ទន់ ចាន់ធី ប្រធានការិយាល័យស្រាវជ្រាវ និងបង្ក្រាបអំពើរត់ពន្ធ តំបន់២ នៃអគ្គនាយកដ្ឋានគយ និងរដ្ឋាករកម្ពុជា កំពុងក្ដោបសេដ្ឋកិច្ចណែនក្នុងដៃ និងប្រព្រឹត្តអំពើពុករលួយធ្ងន់ធ្ងរដោយស្ងាត់ៗ..!!។
តាមរយៈការដាក់ពង្រាយកម្លាំងជនស៊ីវិលគ្រប់ច្រកល្ហក ក្បែរច្រករបៀង.ច្រកតំបន់.ច្រកទ្វេភាគី នៃបន្ទាត់ព្រំដែនវៀតណាម កម្ពុជា ក្នុងភូមិសាស្ត្រខេត្តព្រៃវែង និងស្វាយរៀង ឱ្យអង្គុយចាំរាប់ក្បាលឡាន កំណត់យកលុយ បានយ៉ាងច្រើនសន្ទឹកសន្ទាប់ក្នុង១ថ្ងៃៗ!!។
*ករណីនេះលោក ទន់ ចាន់ធី
បានបដិសេធមិនបកស្រាយឡើយ.!!។
*ជាក់ស្តែងលោក ទន់ ចាន់ធី បានប្រើជនស៊ីវិលដែលជា ដៃជើងរបស់គយចល័តតំបន់២ ឱ្យអង្គុយចាំរាប់ក្បាលឡានកំណត់យកលុយ ត្រង់ចំណុចក្បែរ”ច្រករបៀងក្រសាំងជ្រំ”ស្រុកស្វាយជ្រំ និងក្បែរ”ច្រករបៀងសង្កាត់ច្រកម្ទេស”នៅក្រុងបាវិត.និងដាក់កម្លាំងស៊ីវិល នៅចម្ងាយប្រមាណជា១គីឡូម៉ែត្រ ពីច្រកទ្វារព្រំដែនតំបន់ដូង ស្រុករមាសហែក និងដាក់កម្លាំងស៊ីវិលឱ្យចាំរាប់ក្បាលឡានយកលុយចម្ងាយប្រមាណជាង២គីឡូម៉ែត្រ ពីច្រកទ្វារព្រំដែនទ្វេភាគីបុសមន ស្រុករំដួល ខេត្តស្វាយរៀង រួមនិងច្រកព្រំដែនមួយចំនួនទៀត..!!។
*ទាក់ទិនរឿងនេះ អ្នកដឹកសំបកទឹកសុទ្ធ ពីវៀតណាមចូលមកកម្ពុជា តាមច្រកទ្វារព្រំដែនទ្វេភាគីបុសមន ដោយប្រើគោយន្តកែច្នៃ បានអះអាងថា ខ្លួនដឹក១ជើងៗ បង់អស់ជិត៦០ម៉ឺនរៀលឯណោះ!។
ក្នុងនោះ បង់ឱ្យគយចល័តតំបន់២ ដែលឈរជើង ចាំយកលុយចម្ងាយប្រមាណជាង២គីឡូ ពីព្រំដែន អស់ចំនួន១០ម៉ឺនរៀលជាកំហិត រួមនិងមន្ត្រីពាក់ព័ន្ធមួយចំនួនទៀត។
*អ្នកដឹកផ្លែដូង ដោយប្រើរថយន្តចំណុះ២តោនកន្លះ បានអះអាងថា ខ្លួនដឹក១ជើងៗទម្រាំចេញផុតច្រកព្រំដែនបុសមន បង់អស់ជាង៤០ម៉ឺនរៀល!។
ក្នុងនោះ បង់ឱ្យគយចល័តតំបន់២ ចំនួន៥ម៉ឺនរៀលជាកំហិត! ខណៈរថយន្តដឹកផ្លែដូង ចំណុះ៥តោន បង់ឱ្យគយចល័តតំបន់២ ចំនួន១០ម៉ឺនរៀលក្នុង១ជើង!។
*រីឯម្ចាស់រថយន្ត”វ៉េអង”ក៏បានបញ្ជាក់ដែរថា ខ្លួនដឹកស្រូវទៅលក់ឱ្យឈ្មួញវៀតណាម តាមច្រកបុសមន គឺក្នុង១ជើងៗ បង់អស់សរុបចំនួន២១០.០០០រៀល(ម្ភៃមួយម៉ឺនរៀល)ជាកំហិត!។
*ចំណែករថយន្តសាំយ៉ុង និងរថយន្តកូរ៉េ ដឹកផ្លែឈើចូលពីវៀតណាម តាមច្រកបុសមន ក៏ត្រូវបង់លុយឱ្យគយចល័តតំបន់២ អស់ចាប់ពី១០ម៉ឺន ទៅ៣០ម៉ឺនរៀល ក្នុង១ជើងផងដែរ!។
*ទន្ទឹមនិងនោះ ម្ចាស់រថយន្តខ្លះនិយាយទៀតថា បើទោះបីជា ពួកខ្លួនបង់លុយឱ្យគយចល័តតំបន់២ ដែលឈរជើងក្បែរព្រំដែនហើយក្ដី..!។
ប៉ុន្តែនៅពេលពួកគាត់ ដឹកជញ្ជួនទំនិញឬផ្លែឈើ មកលក់នៅភ្នំពេញ តាមផ្លូវជាតិលេខ១ ក៏ត្រូវបង់លុយឱ្យគយចល័តតំបន់២ បន្ថែមទៀត ត្រង់ចំណុចឃុំរំចេក ស្រុកព្រះស្ដេច ខេត្តព្រៃវែង ពោលគឺ គយចល័តតំបន់២ ដាក់កម្លាំងយកលុយពីរត្រួត…!!។
*ដោយឡែកអ្នកដឹកគ្រឿងជ័រ ពីវៀតណាមចូលមកកម្ពុជា តាមច្រកទ្វារព្រំដែនតំបន់ដូង ស្រុករមាសហែក ដោយប្រើរ៉ឺម៉កម៉ូតូ បានបញ្ជាក់ថា ខ្លួនដឹក១ជើងៗបង់លុយអស់ជាង៣០ម៉ឺនរៀល!។
ក្នុងនោះ បង់ឱ្យគយចល័តតំបន់២ ដែលឈរចាំយកលុយត្រង់ចំណុចមុខវត្ត ចំនួន៤ម៉ឺនរៀលជាកំហិត និងបង់ឱ្យមន្ត្រីពាក់ព័ន្ធជាបន្តបន្ទាប់!។
បន្ថែមពីនេះ រថយន្តកូរ៉េ ចំណុះ១តោន ដែលដឹកក្ដារបន្ទះ ពីវៀតណាមតាមច្រកតំបន់ដូង ក៏បានអះអាងដែរថា ខ្លួនដឹក១ជើងៗបង់អស់ជាង៤០ម៉ឺនរៀលក្នុងនោះ បង់ឱ្យគយចល័តចំនួន១០ម៉ឺនរៀល!។
*ចំណែកអ្នកដឹកផ្លែដូង ពីវៀតណាមចូលមកកម្ពុជា តាមច្រកតំបន់ដូង ដោយប្រើរថយន្តស្តារិច បានបញ្ជាក់ថាខ្លួនដឹក១ជើងៗបង់លុយឱ្យមន្ត្រីពាក់ព័ន្ធនៅច្រកព្រំដែនមួយនេះ អស់ជិត២០ម៉ឺនរៀល ក្នុងនោះបង់ឱ្យគយចល័តតំបន់២ ចំនួន៣ម៉ឺនរៀលជាកំហិត!។
*ដើម្បីឱ្យមានចម្លើយទាំងសងខាងនៅល្ងាចថ្ងៃទី៣០.១២.២០២៥”ដើមរាំង”បានសុំការបំភ្លឺពីលោក ទន់ ចាន់ធី ប្រធានការិយាល័យស្រាវជ្រាវ និងបង្ក្រាបអំពើរត់ពន្ធតំបន់២ដោយលោកថ្លែងថា កម្លាំងរបស់ខ្លួន មានតែនៅលើដងផ្លូវជាតិលេខ១ ត្រង់ចំណុចឃុំរំចេកប៉ុណ្ណោះ!។
*ចំពោះសំណួរថា តើជនស៊ីវិល ដែលកំពុងចាំយកលុយ តាមច្រកព្រំដែននានានោះម៉េចវិញ.?។
*ត្រង់ចំណុចនេះលោក ទន់ ចាន់ធី មិនបកស្រាយឡើយ ដោយលោក រុញឱ្យទៅសួរគេផ្ទាល់ រួចក៏ចុចបិទទូរស័ព្ទ.!!។
*ទោះជាយ៉ាងណាក៏ដោយ ក្នុង១ថ្ងៃៗគេឃើញរថយន្តយីឌុប.រថយន្តកង់១០.រថយន្តកូរ៉េ សាំយ៉ុងកែច្នៃ និងរថយន្តធំតូចគ្រប់ប្រភេទ រួមទាំងគោយន្ត រ៉ឺម៉កម៉ូតូ បាននិងកំពុងដឹកជញ្ជូនទំនិញគ្រឿងដែក គ្រឿងជ័រ អីវ៉ាន់ចាប់ហួយភេជ្ជៈផ្សេងៗ បន្លែ ផ្លែឈើ ពីប្រទេសវៀតណាម ចូលមកកម្ពុជា យ៉ាងគគ្រឹកគគ្រេងបំផុត…!!។
ដែលជាហេតុនាំឱ្យលោក ទន់ ចាន់ធី អាចប្រមូលលុយក្រៅប្រព័ន្ធច្បាប់ បានយ៉ាងច្រើនសន្ធឹកសន្ធាប់!។
ដោយជ្រកក្រោមរូបភាព ដាក់កម្លាំងចាំត្រួតពិនិត្យឯកសារពន្ធ ប៉ុន្តែសកម្មភាពជាក់ស្ដែង គឺប្រើជនស៊ីវិល ឱ្យរាប់ក្បាលឡាន កំណត់យកលុយចែកគ្នា..!!។
*ក្នុងរឿងនេះ អាជីវករសុំស្នើយ៉ាងទទូចដល់ ឯកឧត្តមកិត្តិនីតិកោសលបណ្ឌិត ឱម យិនទៀង ទេសរដ្ឋមន្ត្រីប្រធានអង្គភាពប្រឆាំងអំពើពុករលួយ ឯកឧត្តមបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ
ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាបើកការស្រាវជ្រាវ និងចាត់វិធានការលើលោក ទន់ ចាន់ធី រួមនិងបុគ្គលពាក់ព័ន្ធ ដើម្បីតម្រង់ទិសមន្ត្រីខិលខូចមួយចំនួនឱ្យគោរព តាមគោលការរាជរដ្ឋាភិបាលក្នុងការកំណែទម្រង់ស៊ីជម្រៅ លុបបំបាត់អំពើពុករលួយ បង្កើនចំណូលរដ្ឋ លើកស្ទួយសេដ្ឋកិច្ចជាតិ៕
