ក្នុងអំឡុងពេលបំពេញទស្សនកិច្ចរយៈពេល៤ថ្ងៃ នៅប្រទេសបារាំង សម្តេចប៉ាប លេអូ ទី១៤ (Pope Leo XIV) បានដឹកនាំពិធីបុណ្យសាសនានៅទីលាន Place de la Concorde ដែលមានអ្នកចូលរួមរហូតដល់ ៨០០,០០០នាក់។
នេះគឺជាដំណើរទស្សនកិច្ចលើកដំបូងរបស់សម្តេចប៉ាប មកកាន់ប្រទេសនេះក្នុងរយៈពេលជិត ២០ឆ្នាំមកហើយ។
សារព័ត៌មានAFP។
នៅថ្ងៃអាទិត្យទី២៧.០៩.២០២៦ សម្តេចប៉ាប លេអូ ទី១៤ បានមានបន្ទូលទៅកាន់ជនរងគ្រោះនៃការរំលោភបំពានផ្លូវភេទ ដោយបព្វជិត ដែលទ្រង់បានជួបនៅប្រទេសបារាំងថា ទ្រង់ប្តេជ្ញាចិត្តក្នុងការទប់ស្កាត់កុំឱ្យមានការប៉ះពាល់ផ្លូវចិត្តឬរាងកាយបន្ថែមទៀត។
ទ្រង់ថែមទាំងបានឱបជនរងគ្រោះម្នាក់ ដែលជាបុរសវ័យ ៨០ឆ្នាំ ដោយបុរសរូបនោះបានពណ៌នាហេតុការណ៍នេះថាជា “ពេលវេលាដ៏ពិសេសអស្ចារ្យ”។
មេដឹកនាំនៃសាសនាកាតូលិក ដែលមានសាសនិក១,៤ ពាន់លាននាក់នៅទូទាំងពិភពលោកនេះ កំពុងបំពេញទស្សនកិច្ចផ្លូវការលើកដំបូងក្នុងរយៈពេលជិត២ ទសវត្សរ៍មកហើយ មកកាន់ប្រទេសបារាំង ដែលជាប្រទេសប្រកាន់គោលការណ៍បំបែកសាសនានឹងរដ្ឋ (secular) ប៉ុន្តែមានឫសគល់នៃសាសនាកាតូលិកយ៉ាងជ្រៅ។
នៅក្នុងថ្ងៃទី៣ នៃដំណើរទស្សនកិច្ចរយៈពេល៤ ថ្ងៃនៅទីក្រុង Lourdes ដែលជាទីកន្លែងសម្រាប់អ្នកបុណ្យ សម្តេចប៉ាប បានជួបដោយផ្ទាល់ជាមួយជនរងគ្រោះនៃការរំលោភបំពានចំនួន ៧នាក់(ដែលបច្ចុប្បន្នជាមនុស្សពេញវ័យ)។
បន្ទាប់ពីទ្រង់បានសន្យាថានឹងបង្កើនកិច្ចខិតខំប្រឹងប្រែងដើម្បីកែទម្រង់សាសនាចក្រ ក្រោយពីមានរឿងអាស្រូវនៃការរំលោភបំពានផ្លូវភេទជាសកល។
ក្នុងចំណោមនោះមានលោក Jean-Marie Delbos អាយុ ៨០ ឆ្នាំ ដែលធ្លាប់ត្រូវបានគេរំលោភបំពានកាលពីនៅជាសិស្សសាលាអន្តេវាសិកដ្ឋាន Notre-Dame de Betharram នៅក្បែរនោះ ដែលបុគ្គលិកនៅទីនោះត្រូវបានចោទប្រកាន់ពីបទរំលោភបំពានទាំងផ្លូវកាយ និងផ្លូវភេទអស់រយៈពេលជាច្រើនទសវត្សរ៍មកហើយ។
លោក Delbos បានប្រាប់អ្នកសារព័ត៌មាននៅពេលក្រោយមកថា៖ “នៅពេលដែលទ្រង់បានឃើញស្ថានភាពរបស់ខ្ញុំ ទ្រង់ក៏បានឱបខ្ញុំ”។
បុរសរូបនេះ ដែលបានពណ៌នាខ្លួនឯងថាបានបាត់បង់ជំនឿសាសនាទាំងស្រុងបន្ទាប់ពីការរំលោភបំពាននោះ បាននិយាយថា៖ គឺជាពេលវេលាដ៏ពិសេសអស្ចារ្យមួយ។
ការស៊ើបអង្កេតមួយកាលពីឆ្នាំ២០២១ បានរកឃើញថា បព្វជិត ឬសមាជិកនៃសាសនាចក្រ បានរំលោភបំពានលើអនីតិជនប្រហែល ៣៣០,០០០ នាក់នៅក្នុងប្រទេសបារាំងក្នុងរយៈពេល ៧០ ឆ្នាំកន្លងមកនេះ៕
