(កណ្ដាល)៖ ដី”បឹងរទាំង”ដែលជាដីសាធារណៈរបស់រដ្ឋ រាងទ្រវែងលាតសន្ធឹង បណ្ដោយពីលិចទៅកើត មានទីតាំងនៅក្រោយភូមិរទាំង ស្ថិតក្នុងភូមិរទាំង ឃុំភូមិធំ ស្រុកកៀនស្វាយ ខេត្តកណ្ដាល ទំហំជាង៦០ហិកតា ត្រូវបានលក់ឱ្យឈ្មួញ និងក្លាយជាកម្មសិទ្ធឯកជន ជាបន្តបន្ទាប់!។
បច្ចុប្បន្ន ផ្ទៃដីបឹងមួយនេះត្រូវមន្ត្រីជំនាញ កាត់ឆ្វៀលរក្សាទុកផ្លូវទឹកទទឹង២០ម៉ែត្រប៉ុណ្ណោះ ក្រៅពីហ្នឹង គឺបានក្លាយជាកម្មសិទ្ធឯកជនអស់ហើយ..!!។
*នេះបើយោងតាមការអះអាងពីលោក ខាត់ ឃន មេភូមិរទាំង រួមនិងពលរដ្ឋអ្នកឈរឈ្មោះលក់ដីបឹងផ្ទាល់!។
*ពាក់ព័ន្ធរឿងនេះលោក ខាត់ ឃន
មេភូមិរទាំង បានបញ្ជាក់ថា ដី”បឹងរទាំង”ទំហំជាង៦០ហិកតា ស្ថិតក្នុងភូមិរបស់លោក គឺពិតជាបានលក់ឱ្យក្រុមហ៊ុនប្រាកដមែន!។
បើតាមលោកមេភូមិ បើទោះបីជាលក់ដីបឹងអស់ហើយក្ដី.ប៉ុន្តែអាជ្ញាធរនិងមន្ត្រីជំនាញបានកាត់ឆ្វៀលរក្សាទុកផ្លូវទឹកទទឹង២០ម៉ែត្រ ដើម្បីកុំឱ្យបាត់បង់ប្រព័ន្ធធារាសាស្ត្រ និងជៀសវាងទំនាស់ផ្សេងៗ។
លោក ខាត់ ឃន បញ្ជាក់ទៀតថាដី”បឹងរទាំង”គឺពលរដ្ឋជាអ្នកលក់ ពុំមែនអាជ្ញាធរនោះទេ ហើយការទិញលក់ គឺធ្វើជាបន្តបន្ទាប់ តាំងពីឆ្នាំ២០១៧ រហូតបច្ចុប្បន្ន។
ដោយពេលទិញលក់ ក្នុងដំណាក់កាលដំបូង អ្នកខ្លះលក់និងខ្លះមិនលក់ ពោលគឺ ទើបនិងលក់បង្ហើយនាពេលថ្មីៗនេះដែរទេ!។
លោក ខាត់ ឃន បន្តថា រាល់ការទិញលក់ដី”បឹងរទាំង”សុទ្ធតែមានការឯកភាពដឹងឮ និងចុះហត្ថលេខា ពីភូមិ.ឃុំ.ស្រុកនិងមន្ត្រីជំនាញត្រឹមត្រូវ បច្ចុប្បន្នដីនេះ បានវាស់វែងជាប្រព័ន្ធ និងបិទប្រកាសរួចហើយ រៀបនឹងចេញ(ប្លង់រឹង)។
*ជាមួយគ្នានេះ ពលរដ្ឋដែលជាអ្នកឈរឈ្មោះ លក់ដី”បឹងរទាំង”បានអះអាងថា ផ្ទះរបស់ខ្លួន ខាងមុខទល់និងផ្លូវថ្នល់ ខាងក្រោយគឺខាងកើត ជាប់និង”បឹងរទាំង”តែម្ដង!។
ក្នុងនោះ កាលពីអំឡុងឆ្នាំ២០១៧ និង២០១៨ ស្រាប់តែគេមកសួរទិញដីបឹង ហើយរូបគាត់ និងពលរដ្ឋដទៃទៀត មិនហ៊ានលក់ដីបឹងនោះទេ..!។
ប៉ុន្តែដោយមានការរៀបចំ និងសម្របសម្រួលពីលោក អ៊ូ ឈាង អភិបាលស្រុក ទើបពលរដ្ឋហ៊ានឈរឈ្មោះលក់ដីបឹង ក្នុងតម្លៃ១មែត្រការ៉េ១៨ដុល្លារ…!!។
ក្នុងនោះ ពលរដ្ឋដែលមានដីនិងផ្ទះនៅខាងកើតផ្លូវ ជាអ្នកផ្ដិតមេដៃលក់ដីបឹង តាមកន្ទុយដីរៀងៗខ្លួន និងទទួលបានចំណែក៦៥% នៃតម្លៃដីបឹងដែលបានលក់..!។
រីឯអ្នកនៅខាងលិចផ្លូវ និងពុំមានដីជាប់បឹង គេមិនតម្រូវឱ្យឈរឈ្មោះលក់ ឬផ្ដិតមេដៃអ្វីឡើយ តែទទួលបានចំណែកពីការលក់ដីបឹង៣៥% ជាថ្នូរនឹងមិនតវ៉ាឬប្ដឹងជំទាស់.!។
ពលរដ្ឋបញ្ជាក់ថា មូលហេតុដែលមានការបែងចែក ចំណែកបែបនេះគឺដោយសារដីដែលពួកគាត់ ឈរឈ្មោះលក់នោះ ជាដីបឹងសាធារណៈសុទ្ធសាធពុំមែនជាដីរបស់ខ្លួន។
អញ្ចឹងហើយ ដើម្បីរក្សាភាពស្ងៀមស្ងាត់កុំឱ្យកើតរឿងប្ដឹងផ្ដល់ ត្រូវប្រគល់លុយ ៣៥% ដល់អ្នកខាងលិចផ្លូវ ព្រោះជាបឹងរួម ដែលអ្នកភូមិ តែងតែអាស្រ័យផលនេសាទទាំងអស់គ្នា..!។
ពលរដ្ឋអ្នកនៅខាងកើតផ្លូវ បន្តទៀតថា ខណៈពេលខ្លួនផ្ដិតមេដៃលក់ដី”បឹងរទាំង”គឺមិនចង់ចែកលុយ ឱ្យអ្នកខាងលិចផ្លូវនោះទេ!។
ប៉ុន្តែលោក អ៊ូ ឈាង ចេញមកសម្រួលថា យើងលក់ដីបឹងជាដីសាធារណៈជាសម្បត្តិរដ្ឋ និងបានលុយងាយៗហេតុនេះចែកគ្នាទៅ…!!។
លោក អ៊ូ ឈាង ពន្យល់ថា បើពលរដ្ឋដែលនៅខាងលិចផ្លូវ តវ៉ាប្រឆាំង ក៏យើងលក់បឹងមិនកើតដែរ ម្លោះហើយមានតែចែកគ្នាទើបសុខ!។
ក្រោយមានការណែនាំបែបនេះ ពលរដ្ឋដែលនៅខាងកើតផ្លូវនិងជាអ្នកឈរឈ្មោះលក់ដីបឹងផ្ទាល់ ក៏យល់ព្រមបែងចែកលុយ៣៥% ឱ្យទៅពលរដ្ឋដែលមានផ្ទះទល់មុខគ្នា និងនៅខាងលិចផ្លូវ.!។
និយាយជារួម ពលរដ្ឋអ្នកនៅខាងកើតផ្លូវបានលុយក្នុង១គ្រួសារៗចាប់ពី១០.០០០ដុល្លារទៅ២០.០០០ដុល្លារ តាមដីតូចឬធំ.!។
ចំពោះអ្នកនៅខាងលិចផ្លូវ ទទួលបានលុយចន្លោះពី៣.០០០ដុល្លារទៅ៧.០០០ដុល្លារ ក្នុង១គ្រួសារ.!។
ប្រភពដដែលបន្ថែមថា ពលរដ្ឋខ្លះគេឱ្យផ្ដិតមេដៃទទួលលុយ ចេះតែផ្ដិតទៅ មិនទាំងដឹងថា ខ្លួនឯងលក់ដីបឹងទំហំប៉ុណ្ណា ឬតម្លៃប៉ុន្មាននោះឡើយ.ហើយក៏មិនដឹងថា ទៅថ្ងៃខាងមុខគេកាត់ឆ្វៀលដី”បឹងរទាំង”ឱ្យក្លាយជាកម្មសិទ្ធិឯកជនទាំងអស់ ឬទុកខ្លះសម្រាប់ជាប្រព័ន្ធធារាសាស្ត្រ ផ្លូវទឹកសាធារណៈឬយ៉ាងណា..?។
ស្របពេលដែលឈ្មួញ ដើរប្រមូលទិញដី”បឹងរទាំង”ជាបន្តបន្ទាប់ ទើបនិងទិញបង្ហើយនាពេលបច្ចុប្បន្ននេះ!។
*ដើម្បីឱ្យមានចម្លើយទាំងសងខាងនៅថ្ងៃទី២២.១១.២០២៥”ដើមរាំង”បានសុំការបំភ្លឺពីលោក អ៊ូ ឈាង អតីតអភិបាលស្រុក បច្ចុប្បន្នជាប្រធានក្រុមប្រឹក្សាស្រុកកៀនស្វាយ
ដោយលោកថ្លែងយ៉ាងខ្លីថា ខ្ញុំមិនដឹងទេកុំមកសួរខ្ញុំ ក្នុងនោះលោក អ៊ូ ឈាង បានរុញឱ្យទៅសួរពលរដ្ឋ និងអាជ្ញាធរមូលដ្ឋាន!!។
*រីឯលោក ខាត់ ឃន មេភូមិរទាំងបានបញ្ជាក់ដូចខាងលើហើយ គឺដី”បឹងរទាំង”ជាង៦០ហិកតា លក់អស់ហើយ ប៉ុន្តែកាត់ឆ្វៀលទុកផ្លូវទឹកទទឹង២០ម៉ែត្រ បណ្ដោយពីលិចទៅកើត ពីម្ខាងបឹងទៅម្ខាង.!។
*ចំណែកលោក មាន ណាត មេឃុំភូមិធំ
បានថ្លែងទទួលស្គាល់ថា ពលរដ្ឋពិតជាបាន លក់ដីបឹងតាមកន្ទុយផ្ទះពួកគាត់ ប្រាកដមែន។
ប៉ុន្តែលោកមេឃុំ បដិសេធរឿងទំហំ ដី”បឹងរទាំង”មិនដល់៦០ហិកតា ដោយថា ទំហំប្រហែល៥ហិកតាប៉ុណ្ណោះ និងបានរក្សាទុកផ្លូវទឹក តាមស្ថានភាពជាក់ស្ដែងនៃផ្ទៃបឹង.!។
*ចំពោះលោក កេត ផល ប្រធានការិយាល័យរៀបចំដែនដី នគរូបនីយកម្មសំណង់ និងភូមិបាលស្រុកកៀនស្វាយ
ទូរស័ព្ទរបស់លោក ខលមិនចូលឡើយ!។
*លោក ឡូវ សុខសាន អភិបាលស្រុកកៀនស្វាយ បានថ្លែងថា រឿងទិញលក់ដីរវាងឈ្មួញនិងពលរដ្ឋនោះ គឺតាំងពីរូបលោកពុំទាន់កាន់តំណែងជាអភិបាលស្រុកម្ល៉េះ ហេតុនេះលោកពុំបានដឹងទេ!។
*ក្នុងនោះលោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកណ្ដាល
បានបដិសេធ មិនបកស្រាយឡើយ ដោយលោកថា ទាល់តែមកជួបនៅមន្ទីរផ្ទាល់!!។
*លោក ប្រាក់ ឡាក់ ប្រធានមន្ទីរធនធានទឹក និងឧតុនិយម ខេត្តកណ្ដាល
ក៏មិនបកស្រាយដែរ ដោយរុញឱ្យទៅសួរ អ្នកនាំពាក្យរដ្ឋបាលខេត្តកណ្ដាល.!!។
*លោក ជី ស៊ីវុត្ថា នាយករដ្ឋបាល និងជាអ្នកនាំពាក្យរដ្ឋបាលខេត្តកណ្ដាល
ទូរស័ព្ទចូលហើយ លោកមិនទទួល!។
*លោក ឌឹម បូរ៉ា អភិបាលរងខេត្ត និងជាអ្នកនាំពាក្យរដ្ឋបាលខេត្តកណ្ដាល
បានថ្លែងថា ខ្ញុំរវល់កម្មវិធី ដោយលោកប្រាប់ឱ្យផ្ដល់សំណួរតាមប្រព័ន្ធTelegram។
លុះ”ដើមរាំង”ចូលប្រព័ន្ធTelegram ស្រាប់តែTelegram របស់លោក ឌឹម បូរ៉ា ចាក់សោរនិងប្លុក.!។
*យ៉ាងណាក៏ដោយ ពលរដ្ឋសុំស្នើដល់ ឯកឧត្តម គួច ចំរើន អភិបាលខេត្តកណ្ដាល.ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ.ឯកឧត្ដម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម.ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ.ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់.ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាបើកការស្រាវជ្រាវ វែកមុខអ្នកពាក់ព័ន្ធនិងនៅពីក្រោយ ក្នុងការចាត់ចែងលក់ដី”បឹងរទាំង”និងកាត់ឆ្វៀលដីបឹងឱ្យក្លាយជាកម្មសិទ្ធិឯកជន យកមកផ្ដន្ទាទោសតាមច្បាប់! និងរក្សាដី”បឹងរទាំង”ទុកជាសម្បត្តិរដ្ឋដដែល សម្រាប់អាស្រ័យផលរួមដូចមុនៗ៕
