មន្ត្រីជាន់ខ្ពស់ម្នាក់នៃក្រុមប្រឹក្សាអធិបតេយ្យភាពអន្តរកាល (TSC) របស់ប្រទេសស៊ូដង់ បានបញ្ជាក់យ៉ាងច្បាស់ថា រដ្ឋាភិបាលមិនមានគម្រោងចរចា ឬចុះបទឈប់បាញ់ណាមួយជាមួយកងកម្លាំងគាំទ្ររហ័ស (RSF) ទេ ខណៈសង្គ្រាមនៅតែបន្តបំផ្លាញប្រទេស។
ប្រភពពីសារព័ត៌មានAL Jazeera នៅថ្ងៃទី២៦ខែធ្នូ។
លោក Malik Agar Ayyir អនុប្រធាន TSC បានថ្លែងថា គ្មានការចរចានិងគ្មានបទឈប់បាញ់ ហើយបានអះអាងថា សន្តិភាពយុត្តិធម៌សម្រាប់ស៊ូដង់ អាចសម្រេចបានតាមរយៈផែនទីបង្ហាញផ្លូវ និងចក្ខុវិស័យរបស់ប្រជាជន និងរដ្ឋាភិបាលស៊ូដង់ផ្ទាល់។
ការអត្ថាធិប្បាយនេះកើតឡើងប៉ុន្មានថ្ងៃបន្ទាប់ពីនាយករដ្ឋមន្ត្រី លោកKamil Idris បានបង្ហាញផែនការបញ្ចប់សង្គ្រាមជិតបីឆ្នាំ នៅមុខក្រុមប្រឹក្សាសន្តិសុខអង្គការសហប្រជាជាតិ។ ផែនការនេះទាមទារឱ្យ RSF ដកថយពីតំបន់ដែលខ្លួនកាន់កាប់ ដាក់កងកម្លាំងក្នុងជំរំ ដកហូតអាវុធ និងអនុវត្តការសមាហរណកម្មឡើងវិញសម្រាប់អ្នកដែលមិនជាប់ពាក់ព័ន្ធនឹងឧក្រិដ្ឋកម្មសង្គ្រាម។
ទោះយ៉ាងណា RSF បានបដិសេធផែនការនេះ ដោយហៅវាថាជាគំនិតមិនមានភាពជាក់ស្តែង។ ក្នុងពេលដូចគ្នា ក្រុមនេះបានពង្រឹងការកាន់កាប់ដែនដី និងពង្រីកការវាយប្រហារនៅភាគខាងលិច និងកណ្តាលប្រទេស៕