ប្រធានាធិបតីអាមេរិក លោក Donald Trump បាននិយាយថា លោកនឹងពិភាក្សាជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu អំពីការដាក់ពង្រាយកងកម្លាំងទួរគីទៅកាន់តំបន់ហ្គាហ្សា ជាផ្នែកមួយនៃកម្លាំងស្ថិរភាពអន្តរជាតិ (ISF) ដែលបានស្នើឡើងក្នុងផែនការឈប់បាញ់ 20 ចំណុចរបស់លោក។
ប្រភពពីសារព័ត៌មានAnadolu Agencyនៅថ្ងៃ៣០ខែធ្នូ។
ថ្លែងមុនកិច្ចប្រជុំនៅរដ្ឋ Florida លោក Trump បានបញ្ជាក់ថា លោកមានទំនាក់ទំនងល្អជាមួយប្រធានាធិបតីទួរគី លោក Recep Tayyip Erdogan ហើយបញ្ហានេះនឹងត្រូវពិភាក្សាជាមួយលោក Netanyahu ក្នុងអំឡុងជំនួបនៅរមណីយដ្ឋាន Mar-a-Lago។
កិច្ចពិភាក្សានេះកើតឡើងខណៈដែលការចរចាឈប់បាញ់នៅហ្គាហ្សាកំពុងឈានទៅដំណាក់កាលទីពីរ បន្ទាប់ពីសង្គ្រាមដែលបានបង្កឲ្យមានជនរងគ្រោះប៉ាឡេស្ទីនជាង 71,000 នាក់ និងរបួសជាង 171,000 នាក់ចាប់តាំងពីខែតុលា ឆ្នាំ 2023។ ដំណាក់កាលទីពីរនៃផែនការសន្តិភាពរួមមានការដកទ័ពអ៊ីស្រាអែលចេញពីហ្គាហ្សា ការរំសាយអាវុធរបស់ក្រុមហាម៉ាស និងការបង្កើតរដ្ឋបាលប៉ាឡេស្ទីនបណ្ដោះអាសន្ន៕