អូស្រ្តាលីសម្រេចបិទឆ្នេរសមុទ្រជាច្រើនកន្លែងនៅភាគខាងកើតប្រទេស ក្រោយមានករណីត្រីឆ្លាមវាយប្រហារផ្ទួនៗ

នៅថ្ងៃទី២០ ខែមករា ឆ្នាំ២០២៦ ឆ្នេរសមុទ្រជាច្រើនកន្លែង នៅខាងកើតនៃប្រទេសអូស្រ្តាលី រួមមានទាំងនៅទីក្រុងស៊ីដនី ។

ត្រូវបានបិទជាបណ្តោះអាសន្ន ក្រោយត្រីឆ្លាម ខាំមនុស្ស៤ករណី ក្នុងរយៈពេលត្រឹម២ថ្ងៃនេះ។
សារព័ត៌មាន Reuters ។

ឆ្នេរទាំងអស់នៅជុំវិញទីក្រុង Port Macquarie ចម្ងាយប្រហែល៤០០គីឡូម៉ែត្រ ពីភាគខាងជើងទីក្រុងស៊ីដនី ត្រូវបានបិទបន្ទាប់ពី​បុរសម្នាក់ត្រូវបានត្រីឆ្លាមខាំឱ្យរបួស អំឡុងពេលជិះស្គីលើសមុទ្រ កាលពីវេលាព្រឹកអង្គារនេះ។
រីឯកាលពីថ្ងៃចន្ទ នៅឆ្នេរសមុទ្រមួយក្នុងតំបន់ Manly នៃទីក្រុងស៊ីដនី ក៏មានសេចក្តីរាយការណ៍អំពីបុរសម្នាក់ ត្រូវត្រីឆ្លាមខាំផងដែរ។
ក្នុងថ្ងៃដដែល ក្មេងប្រុសម្នាក់អាយុ១០ឆ្នាំ សំណាងល្អបានរួចខ្លួន ក្រោយត្រីឆ្លាមបុកក្តារសម្រាប់ជិះស្គីលើទឹករបស់គេ ហើយខាំចំត្រូវក្តារស្គីនោះ។
កាលពីថ្ងៃអាទិត្យ ក្មេងប្រុសម្នាក់ បានរងរបួសធ្ងន់ ក្រោយត្រូវត្រីឆ្លាមខាំ នៅឆ្នេរមួយកន្លែងទៀតនៃទីក្រុងស៊ីដនី។
ឆ្នេរទាំងអស់នៅតំបន់ Northern Beaches នៃទីក្រុងស៊ីដនី ត្រូវបានបិទរហូតដល់​ពេលមានការជូនដំណឹងជាថ្មី។

ករណីវាយប្រហារទាំងនេះ កើតឡើងក្រោយមានការធ្លាក់ភ្លៀងខ្លាំង ដែលត្រូវបានអះអាងថា បង្កើតជា​លក្ខខណ្ឌអំណោយផល សម្រាប់ត្រីឆ្លាមប្រភេទ bull shark ដែលសង្ស័យថា នៅពីក្រោយការវាយប្រហារមួយចំនួន។
យោងតាម​ទិន្នន័យ ពីក្រុមអ្នកអភិរក្ស អូស្រ្តាលីមើលឃើញមាន ករណីត្រីឆ្លាមវាយប្រហារប្រហែល២០ករណី ក្នុងមួយឆ្នាំៗ ។
ក្នុងចំណោមនោះ តិចជាង​៣ករណី ដែលមានជនរងគ្រោះបាត់បង់ជីវិត៕