អ៊ីរ៉ង់បានកោះហៅ ឯកអគ្គរដ្ឋទូតសហភាពអឺរ៉ុបប្រចាំទីក្រុងតេអេរ៉ង់ ដើម្បីតវ៉ាប្រឆាំងនឹងការសម្រេចចិត្តរបស់សហភាពអឺរ៉ុប ដែលបានចុះបញ្ជី កងឆ្មាំបដិវត្តន៍អ៊ីស្លាម (IRGC) ជាក្រុមភេរវកម្ម។
ប្រភពពីសារព័ត៌មានAp នៅថ្ងៃទី២ខែកុម្ភៈ។
អ្នកនាំពាក្យក្រសួងការបរទេសអ៊ីរ៉ង់បានថ្លែងថា ទីក្រុងតេអេរ៉ង់កំពុងពិនិត្យជម្រើសនានា និងអនុវត្តសកម្មភាពទៅវិញទៅមកចំពោះអ្វីដែលខ្លួនចាត់ទុកថា ជាចលនាខុសច្បាប់ និងមិនសមហេតុផលរបស់សហភាពអឺរ៉ុប។ ប្រធានសភាអ៊ីរ៉ង់ក៏បានប្រកាសថា អ៊ីរ៉ង់នឹងចាត់ទុកយោធាសហភាពអឺរ៉ុបទាំងអស់ជាក្រុមភេរវកម្មផងដែរ។
សហភាពអឺរ៉ុបបានចាត់កងឆ្មាំបដិវត្តន៍ជាក្រុមភេរវកម្ម បន្ទាប់ពីការបង្ក្រាបការតវ៉ានៅអ៊ីរ៉ង់ ដែលបានបណ្ដាលឱ្យមានជនស្លាប់រាប់ពាន់នាក់ និងការឃុំខ្លួនជាច្រើន។ ការសម្រេចចិត្តនេះបានបន្ថែមសម្ពាធនយោបាយ និងសេដ្ឋកិច្ចលើអ៊ីរ៉ង់ ខណៈកងឆ្មាំបដិវត្តន៍មានឥទ្ធិពលយ៉ាងខ្លាំងលើសេដ្ឋកិច្ច និងសន្តិសុខរបស់ប្រទេស៕