នៅថ្ងៃទី5 ខែកុម្ភៈ ឆ្នាំ2026 ប្រធានាធិបតីសហរដ្ឋអាមេរិក លោក Donald Trump និងប្រធានាធិបតីចិន លោក Xi Jinping បានពិភាក្សាគ្នាតាមទូរស័ព្ទអំពីបញ្ហាតៃវ៉ាន់ ពាណិជ្ជកម្ម និងសន្តិសុខ ក្នុងកិច្ចខិតខំប្រឹងប្រែងបន្ធូរបន្ថយភាពតានតឹងរវាងប្រទេសសេដ្ឋកិច្ចធំបំផុតទាំងពីរនៅលើពិភពលោក។
ប្រភពពីសារព័ត៌មានCNA នៅថ្ងៃទី៥ខែកុម្ភៈ។
លោក Trump បាននិយាយថា កិច្ចពិភាក្សានេះមានលក្ខណៈវិជ្ជមានខ្លាំងហើយបានបង្ហាញថា ប្រទេសចិនកំពុងពិចារណាបង្កើនការទិញសណ្តែកសៀងពីសហរដ្ឋអាមេរិក ដល់ 20 លានតោនក្នុងរដូវកាលបច្ចុប្បន្ន ពីកម្រិត 12 លានតោនកាលពីមុន ដែលជាសញ្ញាសុច្ឆន្ទៈមួយ មុនដំណើរទស្សនកិច្ចរបស់លោក Trump ទៅកាន់ទីក្រុងប៉េកាំងនៅពេលខាងមុខ។
ក្នុងអំឡុងការហៅទូរស័ព្ទនេះ ភាគីចិនបានព្រមានសហរដ្ឋអាមេរិកអំពីការលក់អាវុធទៅឱ្យតៃវ៉ាន់ ខណៈដែលមេដឹកនាំទាំងពីរបានពិភាក្សាបញ្ហាពាណិជ្ជកម្ម និងសន្តិសុខជាច្រើន ដែលនៅតែជាប្រភពនៃភាពតានតឹងទ្វេភាគី។
មេដឹកនាំទាំងពីរបានបញ្ជាក់ជាសាធារណៈអំពីសារៈសំខាន់នៃទំនាក់ទំនងរឹងមាំរវាងប្រទេសទាំងពីរ ដោយលោក Trump បញ្ជាក់ថា ទំនាក់ទំនងរបស់លោកជាមួយលោក Xi គឺ “ល្អណាស់” ខណៈដែលលោក Xi បាននិយាយថា លោកផ្តល់សារៈសំខាន់យ៉ាងខ្លាំងចំពោះទំនាក់ទំនងចិន–អាមេរិក៕