ថ្ងៃទី24 ខែមីនា ឆ្នាំ2026 អាជ្ញាធរលីបង់ បានប្រកាសថា មនុស្សជាង១.១៦ លាននាក់ត្រូវបានផ្លាស់ទីលំនៅ ចាប់តាំងពីការវាយប្រហាររបស់អ៊ីស្រាអែលចាប់ផ្តើមនៅថ្ងៃទី ២ ខែមីនា។
ប្រភពពីសារព័ត៌មានAnadolu Agency។
រដ្ឋមន្ត្រីក្រសួងសង្គមកិច្ច Haneen Sayyed បានឱ្យដឹងថា ចំនួននេះផ្អែកលើការចុះឈ្មោះរបស់ប្រជាជន និងបង្ហាញពីវិបត្តិមនុស្សធម៌ធ្ងន់ធ្ងរ។ អាជ្ញាធរបានបើកមជ្ឈមណ្ឌលស្នាក់នៅជាបន្ទាន់ ដោយចាប់ផ្តើមពី ១៧១ មជ្ឈមណ្ឌលនៅថ្ងៃដំបូង ហើយកើនដល់ ៣២១ មជ្ឈមណ្ឌលនៅថ្ងៃបន្ទាប់ ដើម្បីទទួលអ្នកផ្លាស់ទីលំនៅជាច្រើនម៉ឺននាក់។
តាមរបាយការណ៍ផ្លូវការ យ៉ាងហោចណាស់មនុស្ស ១,០៣៩ នាក់ត្រូវបានសម្លាប់ និង ២,៨៧៦ នាក់រងរបួស ក្នុងការវាយប្រហារដែលរួមមានទាំងការវាយប្រហារតាមអាកាស និងប្រតិបត្តិការដីគោកនៅភាគខាងត្បូងប្រទេស។
អ្នកវិភាគព្រមានថា វិបត្តិនេះកំពុងធ្វើឱ្យស្ថានភាពមនុស្សធម៌នៅលីបង់កាន់តែអាក្រក់ឡើង ខណៈប្រជាជនជាច្រើនបាត់បង់ផ្ទះសម្បែង និងត្រូវការជំនួយបន្ទាន់៕