សង្គ្រាមរវាងអ៊ីរ៉ង់ និងអាមេរិក-អ៊ីស្រាអែល កំពុងតែតានតឹងខ្លាំង។
ប្រធានាធិបតីអាមេរិក Donald Trump បានព្រមានថា ប្រសិនបើអ៊ីរ៉ង់មិនព្រមធ្វើកិច្ចព្រមព្រៀងសន្តិភាពក្នុងរយៈពេល48ម៉ោងទេ នឹងមានការបំផ្លាញកើតឡើងលើអ៊ីរ៉ង់។
ទោះយ៉ាងណា រដ្ឋាភិបាលទីក្រុងតេអេរ៉ង់ បានបដិសេធឱសានវាទនេះ ដោយហៅថា ជាការគំរាមដែលបង្កការភ័យខ្លាច។
ប្រភពពីសារព័ត៌មានAl Jazeera នៅថ្ងៃទី៥ ខែមេសា។
នៅតំបន់ប្រេងឥន្ធនៈ Mahshahr នៃអ៊ីរ៉ង់ ការវាយប្រហារលើអាកាសពីសហរដ្ឋអាមេរិក និងអ៊ីស្រាអែល បានបណ្តាលឱ្យមនុស្ស5 នាក់ស្លាប់ និងប្រហែល170 នាក់រងរបួស។ ការវាយប្រហារនេះ ក៏បានគោលដៅទៅលើសាកលវិទ្យាល័យជាង30 កន្លែងនៅទូទាំងប្រទេស ចាប់តាំងពីសង្គ្រាមបានចាប់ផ្តើម។
នៅពេលដូចគ្នា អតីតប្រធានទីភ្នាក់ងារថាមពលអាតូមិកអន្តរជាតិ លោកMohamed ElBaradei បានរិះគន់យ៉ាងខ្លាំងលើការគំរាមរបស់លោកTrump ហើយព្រមានថា ប្រសិនបើមិនមានការបញ្ឈប់ទាន់ពេល វាអាចធ្វើឱ្យតំបន់មជ្ឈិមបូព៌ាទាំងមូលក្លាយជាកន្លែងសង្គ្រាមធំ៕