ប្រធានាធិបតីអ៊ីរ៉ង់ លោក Masoud Pezeshkian បាននិយាយនៅថ្ងៃពុធទី០៨.០៤.២០២៦ថា ការបញ្ចប់ការវាយប្រហាររបស់អ៊ីស្រាអែល លើប្រទេសលីបង់ គឺជាលក្ខខណ្ឌមួយក្នុងចំណោមលក្ខខណ្ឌ ដែលកំណត់ដោយទីក្រុងតេអេរ៉ង់ សម្រាប់កិច្ចព្រមព្រៀងឈប់បាញ់ ដែលសម្រេចបានជាមួយសហរដ្ឋអាមេរិក។
សារព័ត៌មានAnadolu។
លោក Masoud Pezeshkian បានប្រាប់ប្រធានាធិបតីបារាំង នៅក្នុងការសន្ទនាតាមទូរស័ព្ទថា ការបញ្ចប់ការវាយប្រហាររបស់អ៊ីស្រាអែលលើប្រទេសលីបង់ គឺជាលក្ខខណ្ឌមួយក្នុងចំណោមលក្ខខណ្ឌរបស់ទីក្រុងតេអេរ៉ង់ សម្រាប់កិច្ចព្រមព្រៀងឈប់បាញ់ជាមួយសហរដ្ឋអាមេរិក ដោយសង្កត់ធ្ងន់លើតួនាទី របស់ទីក្រុងប៉ារីសជាអ្នកធានានៃបទឈប់បាញ់ពីមុន។
យោងតាមប្រព័ន្ធផ្សព្វផ្សាយអ៊ីរ៉ង់ លោក Pezeshkian បានធ្វើការកត់សម្គាល់នៅក្នុងការសន្ទនាតាមទូរស័ព្ទ ជាមួយប្រធានាធិបតីបារាំងលោក Emmanuel Macron។
លោកបាននិយាយថា ការបញ្ឈប់ការវាយប្រហាររបស់អ៊ីស្រាអែល លើប្រទេសលីបង់ គឺជាលក្ខខណ្ឌមួយក្នុងចំណោមលក្ខខណ្ឌទាំង10 ដែលភ្ជាប់ទៅនឹងកិច្ចព្រមព្រៀង ជាមួយទីក្រុងវ៉ាស៊ីនតោន។
លោក Pezeshkian ក៏បានសង្កត់ធ្ងន់ផងដែរថា ប្រទេសបារាំង មានតួនាទីសំខាន់មួយជាអ្នកធានា នៃបទឈប់បាញ់ពីមុននៅក្នុងប្រទេសលីបង់។
ប្រធានាធិបតីអ៊ីរ៉ង់ បាននិយាយថា ទីក្រុងតេអេរ៉ង់ បានធ្វើសកម្មភាពដោយមានការទទួលខុសត្រូវដោយទទួលយកសំណើបទឈប់បាញ់ ហើយបានបង្ហាញពីឆន្ទៈរបស់ខ្លួន ក្នុងការសម្រេចបានសន្តិភាព និងស្ថិរភាពនៅក្នុងតំបន់។
មេដឹកនាំទាំងពីរ បាននិយាយគ្នាតាមទូរស័ព្ទមួយថ្ងៃបន្ទាប់ ពីសហរដ្ឋអាមេរិក និងអ៊ីរ៉ង់បានប្រកាសពីបទឈប់បាញ់ដែលមានគោលបំណងបើកផ្លូវសម្រាប់កិច្ចព្រមព្រៀងចុងក្រោយដើម្បីបញ្ចប់សង្គ្រាមដែលបានចាប់ផ្តើមដោយទីក្រុងវ៉ាស៊ីនតោន និងទីក្រុងតែលអាវីវប្រឆាំងនឹងទីក្រុងតេអេរ៉ង់នៅថ្ងៃទី 28 ខែកុម្ភៈ។
ទោះបីជាមានកិច្ចព្រមព្រៀងឈប់បាញ់រយៈពេលពីរសប្តាហ៍ក៏ដោយ កងទ័ពអ៊ីស្រាអែល បានបើកការវាយប្រហារតាមអាកាសយ៉ាងទូលំទូលាយនៅទូទាំងប្រទេសលីបង់ កាលពីថ្ងៃពុធ ដោយបានសម្លាប់មនុស្សយ៉ាងហោចណាស់ 254 នាក់ និងរបួស 1,165 នាក់ផ្សេងទៀត នេះបើយោងតាមការការពារជនស៊ីវិលលីបង់។
ខណៈពេលដែលមន្ត្រីអ៊ីរ៉ង់ និងប៉ាគីស្ថានបាននិយាយថា កិច្ចព្រមព្រៀងនេះ ក៏រួមបញ្ចូលទាំងប្រទេសលីបង់ផងដែរ អ៊ីស្រាអែលបានទទូចថា ប្រទេសលីបង់ មិនមែនជាផ្នែកមួយនៃបទឈប់បាញ់នោះទេ៕