(ភ្នំពេញ)៖ បើទោះបីជាមានភាគហ៊ុន៣០% ក្នុងក្រុមហ៊ុន ហួយវ័ន ផេ ម.ក(HUIONE PAY PLC.)ដែលជា”គ្រឹះស្ថានដកនិងដាក់ប្រាក់”ក៏ដោយ.!!។
ប៉ុន្តែអ្នកឧកញ៉ា ហ៊ុន តូ ពុំដែលមានសិទ្ធិចាត់ចែង លើការសម្រេចរបស់ក្រុមហ៊ុន ហើយក៏ពុំបានដឹងឮ រាល់ការទទួលចំណាយចំណូល របស់ក្រុមហ៊ុនអ្វីដែរ!។
បន្ថែមពីនេះអ្នកឧកញ៉ា ក៏ពុំដែលបានចាត់តំណាងឱ្យចូលរួមប្រជុំដើម្បីសម្រេចការងារផ្សេងៗនៅក្រុមហ៊ុននោះឡើយ.!។
ស្រាប់តែថ្មីៗនេះ មានពលរដ្ឋមួយចំនួនបានប្រមូលផ្តុំគ្នាធ្វើបាតុកម្មតវ៉ា និងចោទប្រកាន់មកលើអ្នកឧកញ៉ា ហ៊ុន តូ ថា ជាថៅកែធំរបស់ក្រុមហ៊ុនខាងលើទៅវិញ!។
ដោយទាមទារឱ្យអ្នកឧកញ៉ា ចេញមុខដោះស្រាយករណីលុយ ដែលពួកគាត់ បានដាក់ចូលក្រុមហ៊ុន ខណៈក្រុមហ៊ុន ពុំទាន់សងត្រឡប់ទៅឱ្យពួកគាត់ ដែលជាម្ចាស់ប្រាក់ដើម..!។
*នេះបើយោងតាម លិខិតបំភ្លឺរបស់អ្នកឧកញ៉ា ហ៊ុន តូ ដែល”ដើមរាំង”ទទួលបាននៅព្រឹកថ្ងៃទី០៦.០៥.២០២៦។
*អ្នកឧកញ៉ា ហ៊ុន តូ បានលើកឡើងយ៉ាងដូច្នេះថា”ថ្មីៗនេះមានសារព័ត៌មានមួយចំនួន បានធ្វើការផ្សព្វផ្សាយព័ត៌មានក្នុងបណ្តាញសង្គម ដោយបានភ្ជាប់រូបខ្ញុំពាក់ព័ន្ធ ជាមួយនឹងក្រុមហ៊ុន ហួយវ័ន ផេ ម.ក(HUIONE PAY PLC.) ដែលជាគ្រឹះស្ថានដកនិងដាក់ប្រាក់។
ក្នុងនោះបានចោទប្រកាន់ខ្ញុំថា ជាថៅកែធំរបស់ក្រុមហ៊ុននេះ ដោយបានប្រមូលផ្តុំធ្វើបាតុកម្មតវ៉ា ដើម្បីឱ្យខ្ញុំចេញមុខដោះស្រាយ ករណីលុយដែលពួកគាត់ បានដាក់ ហើយមិនទាន់បានទទួលការទូទាត់សងវិញ។
ខ្ញុំសូមជម្រាបជូនសាធារណជនមេត្តាជ្រាបថា៖ កន្លងមកខ្ញុំបាទពិតជាមានភាគហ៊ុននៅ ក្នុងក្រុមហ៊ុន ហួយវ័ន ផេ ម.ក(HUIONE PAY PLC.) ចំនួន ៣០% ពិតប្រាកដមែន នៅក្នុង លក្ខន្តិកៈ និងបទបញ្ជាផ្ទៃក្នុងរបស់ក្រុមហ៊ុន ដែលទទួលស្គាល់ដោយក្រសួងពាណិជ្ជកម្មក្នុងឆ្នាំ២០២០។
ប៉ុន្តែ ផ្អែកលើជំពូក២ ចែងអំពីដើមទុន-ភាគហ៊ុន និងប្រការ៩ ស្តីពីការបង់ប្រាក់ភាគ ហ៊ុន ខ្ញុំបាទបានបាត់បង់សិទ្ធិចាត់ចែងការងារទូទៅក្នុងនាមជាម្ចាស់ភាគហ៊ុន ៣០% នេះ តាំងពី ចាប់ផ្តើមដំណើរការក្រុមហ៊ុនដំបូងពីឆ្នាំ២០២០ មកម៉្លេះ ។
ដោយសារតែខ្ញុំ មិនបានបង់ប្រាក់សុទ្ធ ចំនួន៣០% ដែលជាចំណែកភាគហ៊ុនរបស់ខ្ញុំចូលទៅក្នុងក្រុមហ៊ុន សម្រាប់បើកដំណើរការប្រតិបត្តិ ការរបស់ក្រុមហ៊ុន ។
ដោយមូលហេតុ ក្រុមហ៊ុនមិនបានបែងចែកសិទ្ធិអំណាច ឬសិទ្ធិសម្រេចកិច្ច ការងារក្នុងក្រុមហ៊ុន ដើម្បីឱ្យខ្ញុំទទួលខុសត្រូវ ជាពិសេស សិទ្ធិលើការគ្រប់គ្រងចំណូល ចំណាយ និងប្រតិបត្តិការប្រចាំថ្ងៃរបស់ក្រុមហ៊ុន។
បន្ថែមលើនេះ មានចំណុចមួយចំនួនទៀតដែលបញ្ជាក់ថា ខ្ញុំមិនពាក់ព័ន្ធការងារប្រត្តិបត្តិការរបស់ក្រុមហ៊ុននេះដូចជា៖
ខ្ញុំមិនដែលទទួលបានការអញ្ជើញឱ្យចូលរួមគ្រប់កិច្ចប្រជុំ ឬមហាសន្និបាត នៃម្ចាស់ ភាគហ៊ុននោះទេ។
ខ្ញុំមិនធ្លាប់បានចាត់តំណាង ឬតែងតាំងអាណត្តិគាហករួមណាម្នាក់ធ្វើជាតំណាង ភាគហ៊ុន នៅក្នុងក្រុមហ៊ុនដូចដែលបានកំណត់ក្នុងប្រការ១២ ជំពូក២ នៃលក្ខន្តិកៈ និងបទបញ្ជាផ្ទៃក្នុងក្រុមហ៊ុននោះឡើយ។
ខ្ញុំមិនធ្លាប់ទទួលបានប្រាក់ចំណេញ ប្រាក់ភាគលាភ និងទ្រព្យសកម្មបន្តិចណាសោះពី ក្រុមហ៊ុននោះឡើយ។
ខ្ញុំមិនធ្លាប់បានចូលរួមបោះឆ្នោតក្នុងកិច្ចប្រជុំ និងចូលរួមអនុម័តកិច្ចការផ្សេងៗរបស់ ក្រុមហ៊ុននោះឡើយ។
នៅថ្ងៃទី១ ខែតុលា ឆ្នាំ២០២៥ ក្រុមហ៊ុនជម្រះបញ្ជី រីចម៍ & ផាតនើរ REACHS & Partners Co.,Ltd. ដែលជាក្រុមហ៊ុនជម្រះបញ្ជីតាមនីតិវិធីផ្លូវច្បាប់ ។
ដែលទទួលស្គាល់ដោយ ធនាគារជាតិ នៃកម្ពុជាបានបញ្ចប់ការជម្រះបញ្ជី និងបានចេញរបាយការណ៍ចុងក្រោយ ស្តីពីការ ជម្រះបញ្ជីគ្រឹះស្ថានផ្តល់សេវាទូទាត់សងប្រាក់ ហួយវ័ន ផេ ម.ក (HUIONE PAY PLC.)ដោយបានបញ្ជាក់ពីការបញ្ចប់ទាំងស្រុងអំពីការជម្រះបញ្ជីរវាងម្ចាស់បំណុលជាមួយគ្រឹះស្ថាន ផ្តល់សេវាទូទាត់សងប្រាក់ ហួយវ័ន ផេ ម.ក (HUIONE PAY PLC.)។
នៅក្នុងរបាយការណ៍ចុងក្រោយ របស់ក្រុមហ៊ុនជម្រះបញ្ជី បានបញ្ជាក់ថា ក្រោយពីធ្វើការ ទូទាត់សងម្ចាស់បំណុលរួចរាល់អស់ហើយ គ្រឹះស្ថាន ហួយវ័ន ផេ ម.ក (HUIONE PAY PLC.) នៅសល់សាច់ប្រាក់សុទ្ធចំនួន ១.១៨៩.២៣៥,៥១ដុល្លារអាមេរិក (មួយលានមួយរយម៉ែត្រសិប ប្រាំបួនពាន់ពីររយសាមសិបប្រាំដុល្លារ និងហាសិបមួយសេន) និងបានធ្វើការបែងចែកប្រាក់ ដែលនៅសេសសល់នេះជូនម្ចាស់ភាគហ៊ុនពិតប្រាកដដែលទទួលខុសត្រូវក្នុងប្រតិបត្តិការរបស់ ក្រុមហ៊ុនកន្លងមក។
ខ្ញុំមិនមានចំណែក ក្នុងការទទួលប្រាក់ដែលសល់ក្រោយពីជម្រះបញ្ជីនោះទេ ដោយសារតែខ្ញុំ មិនមែនជាម្ចាស់ភាគហ៊ុន ដែលបានពាក់ព័ន្ធជាមួយប្រតិបត្តិការក្រុមហ៊ុនកន្លងមក (ដូចមានក្នុងរបាយការណ៍ជម្រះបញ្ជីចុងក្រោយភ្ជាប់មកជាមួយ)។
បន្ថែមលើនេះ ខ្ញុំសូមបញ្ជាក់ថា ចំពោះគ្រឹះស្ថានផ្តល់សេវាទូទាត់សងប្រាក់ H-PAY SERVICE PLC. ខ្ញុំមិនមានភាគហ៊ុន ឬពាក់ព័ន្ធក្នុងក្រុមហ៊ុននោះឡើយ។
សេចក្តីបំភ្លឺនេះ ជាភស្តុតាង ដែលបញ្ជាក់ការពិត អំពីការមិនពាក់ព័ន្ធកិច្ចការផ្ទៃក្នុងរបស់ ក្រុមហ៊ុន ហួយវ័ន ផេ ម.ក (HUIONE PAY PLC.)ដើម្បីកុំអោយមានការយល់ច្រឡំមក លើរូបខ្ញុំថា ជាម្ចាស់របស់ក្រុមហ៊ុន ហួយវ័ន ផេ ម.ក (HUIONE PAY PLC.) បន្តទៅទៀត។
ខ្ញុំនឹងសហការយ៉ាងពេញលេញ ជាមួយអាជ្ញាធរគ្រប់លំដាប់ថ្នាក់ ដែលពាក់ព័ន្ធ និងត្រៀមផ្តល់ ឯកសារ ឬភស្តុតាងនានា តាមដែលច្បាប់តម្រូវ៕
